美國女星莎朗史東上月在康城受訪時，以「因果報應論」回應對四川地震的看法，招來外間口誅筆伐，近日人氣急升的𡃁模JaniceMan（文詠珊）也加入聲討，不過日前她回應事件時，卻指地震是「上天給予的懲罰，要人們更加保護自然環境」，結果被各個討論區的網友群起狂轟她「講嘢唔經大腦」及「博出位」，更揚言要封殺她。
現年19歲的JaniceMan去年憑年輕及亮麗外形成功彈出，充滿東洋味的打扮更成為潮流指標，成為炙手可熱的模界新星，更被封為𡃁界女神。不過上周四她出席一髮型產品宣傳活動時，被問到對四川地震及莎朗史東（SharonStone）「因果報應論」的看法時，竟指地震是「上天給予的懲罰」，其後經網友多番轉貼，即時招來排山倒海的批評。
上周四Janice回應傳媒有關問題時說：「這不可以說是報不報應，因每個人也不想發生嚴重災難，而且天災的事想避也避不到，可能是上天給予的懲罰，要人們更加保護自然環境。」此話一出，即時引起各方網民狂轟，情況跟當日莎朗史東的「因果報應論」同出一轍。
前輩斥責
馬詩慧：未死過呀？
香港討論區網友雪即以「JaniceMan同莎朗史東都係咁衰!!!!!!!」為題，狂插Janice「講嘢唔經大腦」，獲逾百名網友回應支持，不少人更聲言罷看她的電影及罷買由她做封面的雜誌，網友ape2005則嘲弄她說：「佢用少啲化妝品咪環保囉！」一時間群情洶湧。
另一方面，高登討論區內也有網友提出此事，咖啡貓就指「jm（JaniceMan）同ss（莎朗史東）嘅言論真係……相似度99%」，而uwants網友短髮則謂：「地震關保護環境乜嘢事呀？」直指Janice思想言詞皆幼稚。
其實早前Janice談及四川地震一事時曾眼濕濕，更表示自己捐了8,000元，並考慮助養三名當地孤兒，本來年紀輕輕如此懂事誠屬可嘉，可惜她隨後的發言太過輕率，據知莎朗史東因失言而被內地封殺，損失4.3億港元收入，未知今次Janice又會否步其後塵，令剛起飛的事業受挫？
𡃁模失言，模界一眾大家姐都搖頭，馬詩慧昨日在電話中說：「繼莎朗史東之後未死過呀？一來天災唔係人可以控制，同人做錯事係冇關係，每個國家都有天災，二來所有死難者都係無辜嘅人，點可以話係報應？」
老闆維護
「今次我相信係誤會」
馬詩慧又指年紀輕不是亂說話的藉口，她說：「人有好多種，啲靚妹可能聽到啲人咁講，咪照住講，佢哋睇到時會話『好慘！好慘！』但未必係佢哋真感受，佢哋呢一代受住保護長大，冇咁關愛個社會同其他人，好多嘢只係諗自己先。不過我唔理佢嗰刻個腦諗乜，都應該小心言行，因為佢哋都成為更細年紀嘅後生仔女lookup嘅對象，kindof潮流指標，所以都會有影響。」
至於JaniceMan所屬的StarzPeople老闆鄒世龍，則指是誤會，他說：「我未見佢傾過，佢應該唔係咁嘅意思，係一個誤會。佢係一個細路女，啱啱出嚟做嘢，有心關懷之外都捐咗幾千蚊，每次講起四川都好激動，點會突然轉口呢？今次係誤會多過無心之失，我相信係誤會。」
採訪：林妃、林妙萍
話你知：𡃁模亂噏有前科
現年19歲的JaniceMan，中五畢業，14歲時已被星探發掘，去年夥拍方力申拍攝大家樂廣告始為人熟識，其後她經常與另一𡃁模Angelababy（楊穎）以孖公仔姿態行騷，深受少男垂青，更同被封為「𡃁界女神」，連帶由她參演的電影《愛鬥大》也票房狂收，風頭一時無兩。
一朝得志的Janice樹大招風，被網友揭發食煙、扮嘢加臭檔，但依然沒影響其星運。至於Angelababy其實也試過亂講話，在淫照風暴的敏感期間，竟讚賞疑似張栢芝的淫照影得靚。
全城熱話：少說話快救災
JaniceMan的上天懲罰論，令她步上莎朗史東的後塵，遭網民狂罵無腦兼揚言封殺，也引起了圈中人的關注。
梁詠琪
地震已經發生咗，希望大家唔好將焦點放喺說話度，𠵱家應該去救災，盡快幫助災民重建家園，其他事唔想去評論。
蒙嘉慧
我只希望明天會更好，喺呢個時間唔應該去發表呢啲言論，係首先去救災。
郭可盈
大家都知天災咁無情，災情咁嚴重，天災係同政治及人民扯唔上關係，唔明點解有人咁樣拉埋一齊嚟講，真係有咁講好唔人道。
李彩華
作為中國人係唔應該咁講，𠵱家應該盡力救災，演藝界人士努力咁去呼籲籌款，如果係一個偶像就更加要用自己嘅號召力去勸捐。
江若琳
我之前同JaniceMan合作拍過電影，同佢都幾好傾，唔覺佢成日亂講嘢，可能係大家言語上有誤會，相信佢冇心嘅。
