煲呔話幫局長請一班副局長、政治助理，係要幫手應付政黨、傳媒，即係搞政治工作拆解「政治炸彈」，不過國籍風波卻顯示呢班政治新寵可能係「政治新蠢」，事關佢哋拆彈技巧認真高章，有人未正式返工，已經擺官威玩親疏有別，選擇性回覆傳媒，或者講完唔算數，政治公關技巧係非一般級數。
「心繫加國」嘅副局長蘇錦樑，被揭發有外國籍後龜縮多日，記者搵佢多日都冇回覆，直至入紙申請放棄加拿大護照先露面，大大聲咁話「我從來沒有隱瞞過擁有加拿大國籍」，唔通佢以為外國護照好似「八萬五」咁，冇講等於不存在？
潘潔揀傳媒高層回覆
有美籍嘅潘潔喺宣佈獲委任做副局長當日，曾向記者講吓抱負，爆出國籍風波後，卻好似人間蒸發，八方同事call極都冇回覆。誰不知佢噚日竟然選擇性向部份傳媒高層透露已放棄美籍，後來先透過環境局發言人回覆。放棄美籍加入特區政府服務市民光明正大，點解要咁閃縮呢？如果怕麻煩唔想逐一回覆記者，點解又有部份傳媒高層接到佢電話呢？潘潔做過記者，咁樣對付傳媒係乜心態呢？
楊哲安只現身娛樂版
保安局高齡政治助理盧奕基日前拒絕向電子傳媒透露國籍，轉頭又向一份報章堅稱唔會放棄居英權，一時一樣，誠信何在？佢同潘潔一樣，多日來都冇回覆《蘋果》記者查詢，直至噚日先覆call，八方同事形容佢態度極好，有問必答，似乎想補鑊。
女星張燊悅老公、自由黨議員楊孝華個仔楊哲安有居英權，佢堅持玩親疏有別，向個別傳媒話唔會放棄居英權，卻一直冇回覆《蘋果》查詢，連老竇都話唔知佢搞邊科，只喺娛樂版見到佢嘅新聞，影到張燊悅拖住佢去ball相片。
另一政治助理徐英偉最有型，透過黨主席譚耀宗向記者傳話，表示已決定放棄加籍，點解徐英偉唔自己講呢？如果怕面對傳媒，日後係咪只做幕後唔做幕前？或者佢應該三思，自己係咪適合做呢份工。
八方好公道，唔係個個副局長、政治助理都耍記者，梁鳳儀、許曉暉、梁卓偉同其他人都有紋有路，邊個係政治新寵，邊個係政治新蠢，一眼睇晒。
mailto:[email protected]