名模陳沛嘉（Balia）有位拍拖3年嘅「總舵主」男朋友，咪就係87年憑選無綫《超級新星》脫穎而出嘅前無綫藝員彭文堅囉，當年佢玉樹臨風，得獎之後仲即刻獲派擔正演出《書劍恩仇錄》，接鄭少秋棒飾演陳家洛，只可惜有頭威冇尾陣，冇耐佢就退出娛圈，之後仲轉行從商，近呢幾年佢同Balia拍拖，中年嘅佢有咗愛情滋潤仲越嚟越圓潤，早就變成肥舵主。
煙駁煙吸唔停
彭文堅向來對Balia好疼錫，日前佢哋拍拖去街，彭文堅出動新戰車接載女友，呢架車係佢一個月前以約240萬買入嘅Audi新車。當晚佢哋齊齊坐新車去中環歌賦街一間法國餐廳食晚飯，在場仲有一男一女嘅朋友，佢哋四個人坐喺露天座位，食包鋸扒嘆香檳，但係彭文堅似乎有心事，成晚煙駁煙吸唔停。
去年曾被追數
Balia身為模特兒身材固然fit到漏，雖然男友身形飽滿，肥腩近乎逼爆鈕，但Balia一啲都唔介意，食完飯就同男友手拖手攞車，彭文堅仲好有紳士風度，由於泊車位窄，佢先將車駛出嚟俾女友上車，冧到Balia笑晒㗎！
其實舊年彭文堅曾經俾人追債400萬，Balia仲接到收數佬嘅電話滋擾，要搞到入稟法院禁止債主同其他人對佢作出滋擾行為，呢件事其後先至不了了之。而彭文堅原來揸60幾萬嘅寶馬代步，但發生錢債糾紛後，嗰部車落地唔夠一年就拜拜咗，其後再買咗𠵱家呢架值200幾萬嘅新車，似乎要以行動證明經濟冇問題喎！