八位副局長，兩位有加拿大護照，兩位有居英權，一位有美國護照，比例比左丁山想像低咗一啲；公開晒，咪好囉，搵私隱做擋箭牌，係政治思維錯誤而已，一早講清楚，民眾壓力就唔會咁大。
民建聯嘅蘇錦樑宣佈放棄加籍，在電視上睇，呢位副局長相當醒目，係典型香港式叻仔、醒目仔，與馬時亨局長十分匹配。但佢在傳媒面前嘅談吐與身體語言，似乎表露出心中條氣唔順，有輕佻、招積嘅表情。想當年，馬局長在仙股事件滑鐵盧，捱了一記悶棍，之後從錯誤中學習，今天已經入型入格、滑不溜手。睇嚟蘇副局長要向馬局長學番幾招先，否則好容易跣親馬先生！
有位評論員問左丁山：「潘潔放棄美國護照，會唔會有麻煩呢？」左丁山唔識，照睇就唔會啩，美國政府講人權嘅，政治唔會留難放棄美國籍嘅人士嘅。潘潔丈夫甘陽據講係八九年民運人士，已取得美國籍，當然不可放棄。美國護照係民運人士嘅護身符，大家心照啦，程翔倘若係美國籍，美國政府一早會為佢出頭。但美國政府最嬲國民逃稅，啲著名有錢佬如放棄美籍，好可能畀美國稅局查稅，惹一身麻煩。潘潔唔係大有錢人啩？可以走上花園道交回美國護照就得啦。
有咁啱得咁蹺，飲茶時分，鬼佬Ｒ帶咗一個外國人上嚟，經介紹之後，外國人係俄國裔，法國出世，紐約長大，問佢究竟係揸邊一個國家護照，佢話：「本來係美國法國雙重國籍，十幾年前為咗稅務理由，放棄美國籍，嗰年走入瑞士伯爾尼美國大使館，交還美國護照，聲明放棄美國籍。大使館職員要我填一份問答表，其中一題係問我Whatisthestateofyourmind（你的精神狀態），佢哋梗係以為擁有美籍係一項特權，自願放棄？係唔係儍儍地呀！我填完份表就鬆人，以後冇人煩過我。不過現在揸住法國護照去美國做生意，居留一段長時期就要申請Visa（簽證），啲大使館簽證官員以及機場移民局官員好鬼麻煩。」既然麻煩，可以唔去就唔去啦，九一一徹底改變咗美國政府看待外國人入境嘅心態，一味掛住反恐，唔記得美國亦都需要外國遊客、外國學生、外國學者，最終受到損失嘅，還是美國。