15/16都Out咗一排，呢期幸運號碼係75！自從正式公佈第二輪數碼電視發射站將啓動廣播，好多人都非常緊張自己屋企係咪坐正呢75%覆蓋範圍？當發現自己唔好彩跌入餘下25%非覆蓋範圍時，就好似呢排嘅落雨天一樣，以為冇高清奧運睇之餘，仲以為個天都唔鍾意你！但有數碼視訊器材工程師指出，隨着呢期新發射站開通，99.9%香港人都應該收到數碼廣播！點收？當然有啲技巧啦！
記者：朱崇德、許福合
攝影：陳陶鈞、梁細權、林栢鈞
Model：Kathy
官方口徑：覆蓋全港75%
呢排睇電視，晚晚都見無記喪出將有新發射站啓播，不過畫面稍縱即逝，睇唔清自己有冇份！下圖就係電訊管理局公佈之最新覆蓋範圍，𠵱家可以揸住慢慢睇！其中慈雲山（黃色部份）係年初啓動數碼廣播時首個推出的發射站，其餘顏色各區都係第二輪新推啓播新站位！估計呢七大發射站全開動後，全港將有75%數碼電視覆蓋率。
專家解碼：覆蓋99.9%人人有份
75%覆蓋？咁餘下嗰25%OutRange人係咪要做孤兒仔？就此問題記者訪問了專營衞星及高清視訊器材EightLimited銷售工程師──譚永強先生，佢哋由96年開業至今已先後於西班牙、新加坡、印尼及中東等地從事高清廣播接收器材工程。譚先生指，「如果從『數據』上嚟講，發射站嘅覆蓋範圍係75%！不過從現實角度，超出範圍嘅25%人士，高清訊號可能較弱，不過一樣可以收到冇問題！以我HeadOffice所在的荃灣為例（金山發射站範圍），喺第一期慈雲山站啓播時，我哋試用數碼天線對住青衣接收從海面而來嘅反射訊號，收到完全冇窒格嘅高清電視節目！」
住山窿先至睇唔到
高清數碼廣播同以往Analog訊號制式有少少唔同，Analog年代如果訊號弱會令電視出現雪花同鬼影，但數碼廣播只有「收到」同「收唔到」嘅問題！「一般情況下，都係建議訊號強度在40%或以上較佳。但在實際使用上，就算係反射訊號只有10%已可達致相當穩定嘅接收效果！就算喺大廈林立嘅鬧市，我就曾經喺銅鑼灣渣甸坊商業大廈，用普通室內數碼天線接收高清數碼廣播！
「如果講到數碼廣播最受惠人士，一定係以往Analog廣播制式下重災區嘅旺角同西貢！旺角因為大廈多，反射訊號嘅鬼影問題最嚴重；而西貢區以往亦因凹陷式山谷地理環境，收唔到飛鵝山Analog訊號，變成雪花份外嚴重！據知𠵱家好多人裝咗數碼天線同機頂盒之後，呢啲老問題已經冇晒。大膽啲講句，除非你住喺山窿又或者非常特殊地理環境，8月奧運前七大發射站開通晒之後，相信99.9%香港人都應該收到數碼廣播！」
75%覆蓋：室內天線搞掂
好多人喺屋企玩高清，最大考慮問題係大廈公用天線未升級做數碼！如果你咁唔好彩幢大廈未Ready，又身處75%覆蓋範圍，其實只要自己裝番條有內置放大器嘅室內數碼天線（約$150），就應該收到冇問題；想收得清啲，秘訣係要將天線盡量移近窗口位。
25%非覆蓋：可能要裝天線
雖然話25%非覆蓋範圍人士應該收唔到，但如果知道自己家住覆蓋範圍附近，基本室內天線加數碼放大器都有機會收到。相信問題最嚴重者可能係家住深港邊境人士，但只要安裝一條較長的數碼天線，都大致冇問題。市面現有12節及24節兩大類，價錢分別約為$350及$580，喺鴨寮街亦可以搵到。
路人有Say：我高清咗未？
Tim（西貢）
開咗站啦！之前使好多錢搞條天線都唔理想，𠵱家連室內天線都收得好清！
阿鋒（荃灣）
冇留意高清廣播！乜原來荃灣已經有得睇？大廈天線未得，會用室內天線。
Yan（元朗）
我住東頭村附近，原本應該收唔到！𠵱家知道有其他方法，都會試嘅！
CiCi（銅鑼灣）
8月初就有得睇嘛，我知呀！屋企已經買晒高清機頂盒，等住錄奧運喇！
阿林（銅鑼灣）
我知嚟緊有得睇，不過高清奧運……興趣一般，你話高清世界盃就即買！
小魚（觀塘）
乜已經有得睇嗱？我見阿哥已經買晒機頂盒，今晚叫佢即刻裝、即刻睇。
阿Man（旺角）
我係AVSales，知道高清廣播後LCDTVDemo轉晒做Live，收得清嘛！
小琳（沙田）
我住市中心，一早已經睇緊！收得幾清，不過換電視又買機頂盒幾重皮！
機頂盒：首部內置HDD
𠵱家嘅高清機頂盒市場，冇錄影功能機種嘅全部死晒！無他嘅，𠵱家連內置機頂盒功能嘅LCDTV都出埋，仲點會行返轉頭呢！
一般玩錄影機頂盒，多數都要拖多隻外置式硬碟，EURON最近新出DTR-320HD，機身內置有一隻320GB硬碟，以機頂盒嚟講絕對係全港首部！此機另一特點係內置雙數碼Tuner，呢個亦係首見設計。好處係錄影時可同時任睇其他所有台嘅數碼節目，暫時市面未有類似功能。不過機價就稍貴，要成$3,580，想平平哋玩吓仲有隻250GB版，將於下周初到貨。
其他熱賣機頂盒
大廠出品玩後入式
Victor係影音界老品牌，今次雖以國產機芯代工出品，不過產品檢測勁嚴謹，好多人用過都話好穩定。當好多牌子機都以前入式USB插HDD，佢則係首玩後入式USB插HDD，放入AV櫃都唔會話有電線外露，玩得靚仔。
同機芯送網上Upgrade
呢隻由做衞星、高清器材聞名的EightLimited出品HD838，基本同Victor都係玩緊同一個機芯，以系統穩定見稱。不過佢哋話明有FirmwareUpgrade，一定會最快手放上網，有乜新加功能即刻有得玩！
三胞兄弟忽然冧價
EURON呢隻DMB-T03R，同Victor及Eight係三胞兄弟，基本上介面、功能完全一樣。不過最近中原電器做緊特價，原價$1,680𠵱家$1,390買到，真係平到喊！
日韓贈品機少鑊氣
MagicTVMTV3000係今次介紹嘅機頂盒中，唯一冇插HDD錄影功能機種！點解會成為熱賣機？原因好多日韓LCDTV大廠都以此機做「跟機送」嘅機頂盒，亦係睇中佢夠簡單，少鑊氣問題。
now最靚仔只租不賣
AV場內人士公認，now隻All-In-OneSet-Top-Box係現時市面上最靚仔機頂盒！現時只要使用$368或以上的now服務計劃，就可以免費借畀你用；如果月費低於$368用量用戶，就要畀$38租機月費。此機同樣具備睇now節目同高清數碼電視功能，不過就冇USB插HDD錄影。
香港寬頻唔使錢
唔想使錢又想玩高清機頂盒？香港寬頻隻S-Box7120THP一部機睇晒bbTV節目兼玩高清，慳地方唔使機叠機，機身更內置兩組USB，插HDD同手指錄影都得！最近出新Plan簽「bbTV數碼電視服務合約」之$68月費（兩年約），就免費送畀你，仲有54條bbTV頻道，好似AXN、香港新聞、電影台畀你睇，勁抵玩！
查詢
a.中原電器（25063838）
b.英京（23915331）
c.豐旭（31884362）
d.香港寬頻（128100）
e.PCCW（28881888）