年屆34歲嘅哈佛小甜甜任葆琳，隨住年齡嘅增長，唔單止越嚟越好肉，而且喺佢身邊氹氹轉嘅男伴亦越嚟越多，換畫快過打針。近期任葆琳又喺蜜運之中，聽聞佢嘅男朋友係一名股壇狙擊手，全職炒股，佢哋拍拖原來有半年囉。
見記者彈開
近年任葆琳發福唔少，𠵱家有愛情滋潤就更加肥美㖭，真係啖啖肉㗎。日前凌晨12點幾，任葆琳拖住新歡夜蒲老蘭（蘭桂坊），當時佢一身超低胸性感打扮，酥胸半露，肥美身形一覽無遺，佢蹺實男友嘅臂彎現身中環明星夜場Dragon-i，同行仲有幾個男性友人㖭，估唔到認拍拖嘅任葆琳仲要避忌，離遠見記者即刻甩開男友隻手，兩個人保持距離，分開入場。
當晚Dragon-i非常熱鬧，唔知係咪太多人嘅關係，任葆琳同男友入場唔夠20分鐘就出番嚟，任葆琳步出夜店嘅時候表現好小心，左望右望視察環境，見在場冇記者先至同男友拖手落樓梯，佢個男友亦俾佢感染咗鏡頭恐懼症，一路行一路左右張望，證實冇鏡頭對住之後，竟然一手拖實女友，另一隻手就𢱑鼻，相當不雅，不過任葆琳掛住四圍望，都冇留意男友同場加映嘅騎呢一幕，其後記者影相，佢就特登加快腳步，拖住男友走入人叢中繼續夜蒲搵節目。