喺一片噓聲之中，譚志源同蘇錦樑兩個副局長噚日率先履新，但有關副局長同政治助理嘅國籍同薪酬問題仍然唔清唔楚，睇嚟煲呔仲有排煩。八方聽聞，雖然副局長嘅月薪最高可達23萬幾，比政務官（AO）之中最高級嘅常任秘書長月薪只係19萬仲要高，但有資深政務官講到明，副局長絕對唔係佢哋嘅波士，唔可以直接指揮佢哋，佢哋只會聽命於局長咁話。
免局內出現雙重司令
由於班副局長會陸續上任，啲局長近日已明令局內各組別嘅高級政務官，為自己嘅未來近身做好準備，睇吓點樣幫佢哋盡快入局。有政務官同八方講，各個局基本上都會採用同一格式，寫好一叠局內工作清單同簡介，當做副局長同政治助理嘅餐單頭盤。雖然係簡介，但每組幾頁紙加起嚟叠簡介都有成寸厚。
食完頭盤就要揀主菜。理論上副局長同局長分好工，班新丁要深入知啲乜，就要同政務官講，由政務官提供更詳盡資料。副局長應該會分擔局長嘅一啲政治工作，據聞有局長已經同啲政務官講明點樣劃清界線，以免局內出現雙重司令。啲副局長出去做政治工作前，唔會直接指令政務官幫手，而係由局長喺內部會議上同大家講清楚，政務官聽完就去配合副局長嘅工作，即係唔會直接聽副局長支笛。
有政務官不諱言，副局長唔係局長，政務官只係聽命局長，如果副局長執行局長嘅命令，叫政務官做嘢，政務官一定去做，但如果只係副局長個人意思，咁就對唔住嘞。
班AO估計，副局長去到出面同啲團體或各界人士推銷政策將係佢哋嘅一大考驗，事關同一界別嘅唔同團體立場都唔同，坐埋一齊有可能嗌大交，而根據呢班副局長嘅背景，佢哋似乎唔係好有政治經驗，同啲團體又唔熟，如果要出席立法會，就更加容易出醜。
其實民建聯副主席出身嘅蘇錦樑第一關考驗已經唔合格，佢公開解釋時話係佢自己同記者講有加拿大護照，唔係記者「揭發」，咁講即係承認自己親手埋個炸彈畀自己同埋所有副局長踩，煲呔聽到都會激死，炸親自己之餘仲害埋其他候任副局長，以後同佢合作嘅政務官，邊有人信佢嘅政治智慧。
mailto:[email protected]