伴隨籃球迷成長的日本漫畫《男兒當入樽》中，主角櫻木花道為了備戰全國大賽，特地於暑假進行跳投兩萬球特訓；香港亦有兩名年輕球員周健宏（肥宏）及劉凱濤（阿濤），日前參加了Nike亞洲籃球訓練營，為7月舉行的NikeLeague作準備。文/攝：陳耀麟
身高1米95的「肥宏」和兩米高的「阿濤」，在學界籃下均未逢敵手，但上周在廣州舉行的Nike亞洲籃球訓練營中，面對58位來自中、日、韓、台灣、菲律賓和澳洲，體形巨大的籃球「高人」，頓時顯得十分渺小。
「肥宏」變後衞練好外投
其中「肥宏」更被安排改打得分後衞，身高1米95的他坦言：「進攻時要外投還可以應付，但在防守時面對速度奇快的外線球員，讓我感到很辛苦。」
每天3個小時的射球訓練，每次練習均要射入多個外投，「肥宏」笑言與櫻木花道的射球特訓不遑多讓：「5天以來日日射波，冇一萬都幾千。」向來比賽時在3分線上偶有佳作的「肥宏」，表示感激美籍教練哈普拉的專門指導；今次訓練營對「肥宏」來說，外投成為他最大得着。
「阿濤」變大前鋒打速度
身高兩米的「阿濤」在今次訓練營中獲指導作大前鋒訓練，但對他來說仍然是一大挑戰：「香港的大前鋒與其他地方的大前鋒打法並不同，香港的大前鋒其實與中鋒差別不大，但在今次訓練營中，一班在NBA執教的教練團，對大前鋒要求速度、支援，令大前鋒幾乎成為整個球場中跑動最多的球員。」
在香港，通常於籃下「搵食」的「阿濤」笑言，今次訓練營令他靈活不少，向來動作較「鈍」的他，經過特訓後各方面的能力也有提升，向他成全能球員之路邁進一大步。
周健宏
17歲
身高：1米95
體重：90公斤
就讀學校：英華書院（中四）
個人榮譽：07年亞洲室內運動會3人籃球賽季軍、07年NikeLeague19歲或以下組別冠軍兼籃板王及最有價值球員
劉凱濤
16歲
身高：2米
體重：81公斤
就讀學校：拔萃男書院（中五）
個人榮譽：07年亞洲室內運動會3人籃球賽季軍、06、07年NikeLeague16歲以下組別冠軍
《花絮》
美籍教練籃框係朋友
全場射波最準嗰位並唔係亞洲嗰60位籃球精英，而係美籍教練哈普拉（右），佢嘅網頁（ http://www.davehopla.com/）入面話佢試過射500球入495球。小記喺現場睇住佢一路講解一路射波，計計埋埋射咗200球中距離，炒得兩球，籃框可能真係佢朋友！
伊古達拉亂咁吹
費城76人球星伊古達拉（中）今次亦都係訓練員之一，但係佢並唔係教班亞洲代表，而係一齊接受呢班NBA教練嘅訓練，不過話晒都係NBA球星，都有特權嘅，佢曾經試過喺一場分組練習賽入面幫手做球證，不過小記睇佢手勢做到錯晒，搞到一班球員好似唔多明佢點吹，如無意外佢應該冇球證牌！
日本第2個田臥勇太
成個訓練營入面得一個日本人入選，佢就係年僅18歲嘅並里城（右），仲幾乎係今次訓練營入面最矮細嘅球員（1米70），但球技絕對備受教練團嘅讚賞，速度又快、3分又準；據講佢嚟緊將會遠赴美國讀書，照睇以佢咁年輕兼咁有實力，可能有機會成為第2個田臥勇太，進軍NBA都未定。
知多啲：NikeLeague今屆改制
本屆賽事以3人籃球賽（取代個人報名）作為首輪選拔，並由籃總委任資深教練從中挑選450名球員（350男、100女）參加籃球訓練營，當中表現出色的96位19歲以下、72位16歲以下男球員及48位女球員將被編成不同隊伍參加賽事。報名截止日期為6月13日。可透過 http://www.nikebasketball.com.hk於網上報名。