劉德華啱啱先至忙完《演藝界512關愛行動》大滙演，噚日又馬不停蹄飛咗去海南島嘅三亞，出席《愛心呵護陽光行動》嘅記者會，原來華仔係去嗰度拍賣屬於佢嗰支火炬，除咗華仔支火炬外，另外仲會拍賣海南島當地兩位火炬手嘅火炬，而拍賣所籌得嘅善款就會成立一個名為「火炬陽光教育基金」，善款用嚟幫助四川地震災區嘅教育工作。
安撫小朋友心靈
當拍賣第一支火炬嘅時候，華仔立即參加競投，結果佢以75萬人民幣投咗人哋支火炬。至於華仔嗰支火炬，大會安排喺最後先拍賣，當宣佈拍賣開始，全場人士立即起哄，而華仔嗰支火炬底價係100萬人民幣，每次叫價係10萬人民幣，經過多次叫價之後，最後以190萬人民幣成交，華仔咁樣一買一賣就籌咗265萬人民幣（約港幣298萬元）。
問華仔滿唔滿意呢個價錢？佢話：「唔好講話滿唔滿意，最重要係籌到啲錢畀四川嘅小朋友，我投咗人哋支火炬，呢支火炬有重要嘅意義。」華仔表示嚟緊仲有好多有關四川賑災嘅嘢要做，其中一件事就係要調整喺地震中失去親人嘅小朋友嘅心靈，同埋要幫佢哋重建家園。