內地電訊業重組已經出台，噚日幾隻喺重組後復牌嘅電訊股都俾人狂沽，中電信（728）、聯通（762）及網通（906）等，一復牌股價就急挫10%以上，嘉賓認為電訊股一兩日內依然有沽壓，但下跌幅度唔會太深。
楊：楊慧玲 沈：沈振盈
楊：電訊業重組前電訊股俾人炒上，聯通出售CDMA之後復牌，但係股價反而急挫，如果有持電訊股嘅散戶應該再吸納，定係忍痛放貨好呢？
沈：高位搶貨嘅散戶會難捱啲，不過咁，雖然呢一兩日電訊股仲會有沽壓，但係睇股票要睇長遠啲。其實聯通表面上好似係贏家，但佢賣咗嘢畀人仍未完全脫離流動電話服務，加上佢收返嚟嘅錢唔會派特別股息，呢點令散戶失望，所以跌得勁。而中電信就係俾人過份炒咗上去，所以沽壓比較大，不過我覺得佢哋唔會跌得太深嘅。至於未來嘅電訊業，我就淨係睇好中電信同中國移動（941）。
買輪等技術性突破
楊：我有啲朋友喺停牌前入咗電訊股窩輪，𠵱家跌咗咁多，部署係咪有變呢？
沈：如果揸輪就一定要走咗先喇，要等正股喺低位重新組織，建立到穩健嘅平台之後，開始有動力嘅時候先買番，因為窩輪唔可以買嚟坐，係當佢有技術性突破，追上車食佢嗰轉升幅。如果今日（即昨日）都仲未走，就可以睇埋呢一兩日有無反彈先走。
阿里巴巴上望空間小
陳先生：我買咗阿里巴巴（1688），諗住短炒，點知放喺度個幾月都無升，15蚊止蝕之後唔知換馬邊隻？
沈：佢業務前景係有嘅，盤生意係有得做，不過都係個價貴定平嘅問題，佢上市嗰時炒到400幾倍市盈率真係非常唔合理，雖然佢𠵱家個價合理咗好多，但唔知佢幾時有得炒起，好似等運到咁。雖然阿里巴巴呢個位下跌空間唔大，但上望都只係16蚊左右。
陳先生：其實我都幾睇好中國鋁業（2600），唔知幾時換馬好？
沈：如果換馬就𠵱家換喇，如果你等阿里巴巴上返16蚊時先換，可能中鋁都升咗好多㗎喇。中鋁走勢非常靚，市場上鋁材需求好大，所以相關股份都升緊，我上望中鋁去到17蚊左右，現價入都幾好。
-葵涌陳先生個案-
買入價：16元
目標價：17元
止蝕價：15元
時期：兩星期
A50有機破20蚊
簡：之前沈大師話A50中國（2823）目標價20蚊，5月初嗰陣係咪算到咗㗎啦?
沈：19.6蚊左右接近㗎啦。落返嚟再買番啦，因為我覺得上海A股個底係3500點，今次再上去我覺得可以去到4100點左右，A50有機會再衝上20蚊樓上，如果你上次走唔甩可能等今次。
簡：其實我買A50call輪（13242），10月到期，$19.12行使價，好唔好等佢再暴升時走，等佢回返再買？
沈：股票唔怕買嚟坐，但係窩輪就唔好坐喇，你等正股走勢開始出現突破時先追入窩輪，如果真係破位個引伸波幅就會擴張，嗰陣仲會賺埋引伸波幅。到個引伸波幅好貴、正股又去返阻力位嘅時候就要走一走。所以窩輪就唔係用嚟死坐爛坐，特別係𠵱家熊巿嘅巿況裏面要一轉一轉咁賺錢㗎。
-屯門簡先生個案-
買入價：0.147元
目標價：-
止蝕價：-
時期：兩個月
中電信4.8蚊可加注
麥先生：我今日（即昨日）買咗中國電信（728），以為佢已經跌夠，點知佢低處未算低。
沈：如果你短炒係入早咗，但係中線掙一兩毫都唔係問題，沽盤預佢兩三日先完，你唔怕等一等揸多陣，博下轉角升番上去。
麥先生：如果加注應該喺邊個價好呢？
沈：4.8蚊左右呢啲位如果唔穿都可以加注，或者等佢上破5蚊先再買。
麥先生：4.5蚊止蝕合唔合理？再上7蚊唔破我都會走。
沈：我覺得4.5蚊止蝕好合理，我睇佢技術支持位係4.8蚊，如果4.5蚊都穿埋真係唔使諗一定走。
-上環麥先生個案-
買入價：5.06元
目標價：6.5元
止蝕價：4.5元
時期：三個月
太平洋恩利不宜短炒
何太：我睇報紙講太平洋恩利（1174）幾好，佢市盈率低，業績又幾好，係咪都要靠基金呢？
沈：有基金唔一定好，升當然靠基金啦，但係跳崖式咁跌都係靠基金㗎，所以基金股唔係一定好，而基金經理揀股都未必一定好。佢市盈率係低，不過最重要睇佢業務前景，佢國內市場係有增長力。𠵱家呢啲位買唔壞，風險唔大，不過佢幾時行真係唔知，你買咗要預佢係長線投資，坐喺度等㗎咋，買咗你要一定留意佢嘅市場動向。如果你係短炒嘅話，我真係有啲戒心，因為實在太多人睇到報紙之後問我呢隻股喇。
-青衣何太建議-
建議買入價：1.55元
目標價：-
止蝕價：-
時期：兩星期
每日收市後4:30pm
歡迎click入 http://finance.appledaily.com
以webcam參與節目及收看
歡迎phonein28698262暢談心得
亦可email至mailto:[email protected]搶先貼股
