新世界發展（017）主席鄭裕彤長子嫡孫鄭志剛（Adrian），最近除咗籌備本月21號舉行嘅訂婚儀式，仲幫新世界搞緊個大project。華華噚日八到，Adrian最近受阿爺同阿爸所託，要搞好尖沙嘴河內道重建項目裏面個商場。
需知道河內道重建項目係新世界今年底至明年初嘅賣樓重頭戲，成個項目總樓面110萬平方呎，當中包括一個總樓面34萬平方呎、可通往港鐵尖沙嘴站嘅商場。
晚晚捱到凌晨
據講，呢個項目能否賣出一個好價，全靠呢個商場，可想而知Adrian壓力有幾大，聽講佢最近晚晚捱到凌晨先離開公司，對黑眼圈同國寶有得揮咁話。
Adrian之前幫阿爺打理新世界百貨，有板有眼，今次第一次幫新世界搞香港嘅商場，好似話想以九龍站嘅圓方為藍本，搞個中高檔次兼有特色嘅商場，大家拭目以待。