豪，唔一定講豪華，亦可代表豪氣，尤其對住現代（Hyundai）嘅Sonata2.4，剛剛熱辣到港，新車一代比一代高性能，亁濕地跑起上嚟一樣咁爽咁得心應手，而且韓製越出越醒神，沒有邪惡霸氣、不設兇猛包圍，Sonata以近似俠士正氣現身。
記者：梁美甜
攝影：王文忠
模特兒：Tiffany（TheGroup）
擺脫韓式形象
韓國出產嘅電子用品不嬲都拍得住日本Brand，受市場一定追捧；唔知點解韓國出產嘅車就總係得唔到車迷歡心，可能同我一樣，認為太過塑膠兒戲吧！之不過，經過今次試駕Hyundai剛到港嘅新一代小改款中型房車Sonata2.4後，對韓車不得不重新改觀。
第一眼見到新生代Sonata，差不多完全脫離韓車既有影子，美其名為小改款，實則同上一代差距都唔少，真係可以用驚喜嚟形容。新車用上更闊更大頭燈、鬼面罩同霧燈，車身線條無論係車頭、車側同後電鍍線等都係全新設計，再加埋17吋輪圈，令第四代Sonata整體流露出貴氣同動感。
高水準新生代
外觀帶嚟嘅衝擊都唔夠新車性能同內裝嚟得震撼，比起以前，對韓國車嘅性能、內觀甚至隔音都唔會有太高期望，平復初見面驚喜心情之後，上車，咦？空間好闊落寬敞，仲有埋天窗、電椅同恒溫冷氣等，廿萬唔到嘅車價喎，又係另一驚喜；誰知一波未平，另一波又嚟。出發，遇着雷雨天，外面橫風橫雨，除咗初段以較慢速度離開擠迫嘅工廠區之外，一出大路及上高速，加速轉波反應順滑利落，畀到信心以高速入彎（當然唔係過百咁掟住入！），或許新車採用全新2.4公升直四引擎兼加入DVVT裝置，再配搭新5前速+/-半自動波箱之故，就連馬力都比之前多咗12%，達174匹同23.5kgm扭力；就連隔音都出乎意料之外嘅好，除咗暴雨時聽到雨點打落車頂嘅聲之外，基本上無咩外來雜聲，就算揸到去拍攝地點都好，唔落低電窗都唔知外面雨勢勁唔勁、密唔密，犀利！
1.新一代Sonata單係外形一欄，已一洗既有韓國車影子。
2.新式頭燈及霧燈都較以往闊大。
3.17吋輪圈配新引擎，令行車更順滑利落。
4.中控台設計簡約，多功能軚盤完全係高價房車格調。
5.呢個車價有部「歐洲」車兼有埋天窗，筍到暈！
6.皮椅夠貴格，內櫳寬敞夠舒服。
7.跑咗半日，行咗17公里，用油都唔使一格，幾慳油喇！
8.全新5前速+/-半自動波，提供更多駕駛樂趣。
9.車尾加有電鍍邊裝飾，望落即刻型好多。
10.尾箱容積夠晒大，幾個手提行李都擺得落。
規格表
引擎：2,359c.c.直4DOHC
馬力：174ps/6,000rpm
扭力：23.5kgm/4,000rpm
傳動：5前速+/-半自動波，前驅
查詢：現代汽車（34288288）