李彩華（Rain）早前傳出被舊愛蕭定一翻𠝹，但蕭定一媾女革命未成功，原因是女方已另結新歡，與樂基兒前男友、《華僑日報》後人岑啓智（Alex）蜜運。前日二人拍拖去南華會碌齡，身穿豹紋背心的Rain露纖腰大晒球技，睇到Alex心花放，反觀蕭定一甫聞舊愛新戀情，則態度冷冰冰。
現年24歲的李彩華對成熟型男士似乎情有獨鍾。去年她與年長10年的美容公司老闆蕭定一結束三年情後，有傳蕭定一出盡法寶箍煲，早前相約Rain睇戲，關係似有轉機，但實情他翻𠝹無望，因Rain已轉投37歲新歡岑啓智的懷抱。
陳敏之做紅娘
據知Rain半年前由好姊妹陳敏之介紹下，認識樂基兒舊愛、已停辦的《華僑日報》後人岑啓智，男方即對她鍥而不捨狂追，終在一個月前奪得伊人芳心，兩人不時出雙入對。繼上月被拍得Alex陪她逛街食飯後，前日他們又拍拖碌齡，全程喁喁細語，卿卿我我，當正同行的電燈膽男友人透明。
前日下午4時，戴cap帽、身穿豹紋背心襯牛仔短褲的Rain，以hotgirl打扮相約Alex到南華會碌齡，雖然在場尚有一名男友人，但Rain和Alex完全懶理，逕自投入甜蜜蜜的碌齡世界，又分別化名Pretty及MasterAlex記錄分數。
現場見Rain的打波姿勢雖然騎呢，經常露腰及露bra帶，但其球技不錯，連打四、五局都保持100分以上，當她補中或全中時，更開心得在球技更勝她的Alex面前，舉起勝利手勢兼甜笑，令他笑不攏嘴。兩小時後，Alex結賬與Rain並肩走到街上，沿途有傾有講，同行男友人則識趣彈開兼截的士，其後三人齊登車趕下場。
李彩華昨日接受電話訪問時例牌否認戀情，但問她可覺得Alex有追求之意？她笑說：「真係唔知係唔係，當佢朋友咋。」她又稱與蕭定一仍是朋友，如她真的拍拖，相信蕭定一也戥她高興。
蕭定一：祝福佢
Rain盡情享受拍拖樂，箍煲失敗的蕭定一昨日知道舊愛有新戀情後，在電話中冷淡地說：「佢一向都搵緊男朋友㗎啦，如果佢拍拖都戥佢開心，祝福佢啦。」但問到會否覺得二人相配，他則說：「冇乜特別，OK啦。」早前傳他翻𠝹Rain，他卻說：「梗係唔係啦，睇戲好普通啫。」
採訪、攝影：娛樂突發組
人物誌：鑽石王老五曾迷樂基兒
與李彩華拍拖打保齡的《華僑日報》後人岑啓智（Alex），是已結業的《華僑日報》創辦人岑維休的孫兒。現年37歲的Alex曾在美國讀書及工作，又獲名人雜誌《Tatler》選為鑽石王老五，03年被發現與潘廸生女兒潘楚穎經常出雙入對。
06年5月，Alex被指介入黎明與樂基兒（圖）的戀情，趁黎明在上海拍戲時與樂基兒約會，兩人在中環撐枱腳嘆下午茶，態度親暱，更前後腳返回樂基兒位於羅便臣道蕙恩閣的寓所。
