星期五中午飲完茶，二時二十五分，行經皇后大道中興瑋大廈。呢度平時任何時間都塞滿人、塞滿車，呢日特別厲害，因為美國牌子Coach（據講係名牌，左丁山唔多識）在此為香港旗艦店開幕。興瑋大廈為咗呢個大租客，將地下間隔完全改變，裝修近六個月，Coach唔知用咗幾多錢先至叫做大功告成，故此開幕儀式少不了大鑼大鼓，警方准佢封咗半條馬路，否則我哋一般人冇路行。行過之時，聽到一位美國人在店內致辭，有普通話即時傳譯，但冇廣東話。香港雖然係廣東人廣東話城市，但在國際名牌子心目中，普通話先至重要，香港人唔識聽嘅話，抵你係笨蛋。
名牌旗艦店在中環開完一間又一間。Coach在五月三十日下午二時開幕，太平行嗰間意大利牌子Diesel在五月二十九日下午黃昏時候開幕，呢個牌子租兩個舖位，地下及地庫打通，仲租埋一樓以前Headquarters嘅地方，每個月租點都要一百萬元以上啩，應該有多冇少。據秘書V講，Diesel係賣牛仔褲出名嘅。原來賣牛仔褲（Diesel）與賣手袋（Coach）都可以負擔得起咁貴租金，香港與大陸、台灣女士應記一功，女人嘅錢比較容易賺，故此中環豪華裝修名店全部係賣女士時裝、手袋、牛仔褲嘅，男士專門店就唔多覺，就算有，舖位總係細一啲。
兩間歐美名牌同時在大道中霸位，於是成班高層人員嚟晒香港，住響邊呢？據一位與名牌界特別接近嘅消息人士講，啲公司大人物住晒大道中「置地文華」，主要係地點方便到極，而啲大人物等旗艦店開幕之前，可以順便行吓置地廣場嘅名店群以及置地文華對面及隔籬嘅名店，真真正正一眼望晒；倘若住在其他酒店，就要用多啲時間咯。不過方便還方便，世界上啲大人物總係慣咗坐大房車出入嘅，何況上星期四、五有雨落㖭。一位聰明人畀左丁山一條IQ題：「喺HarveyNichols門口上車，到太平行Diesel門口附近落車，你點樣行？」左丁山即時鬧佢搵笨，行過條馬路就係啦，唔使三分鐘，坐乜嘢車呀？聰明人大笑：「抵你左丁山上唔到位，叫大老細行路？識唔識擦鞋㗎？諗通咗就有資格傍住大老細嘞！」左丁山對呢啲嘢永遠都諗唔通。