小馬哥上場，國共兩黨頭頭歷史性接觸，見北京、台北咁好關係，民建聯都對台灣充滿無限幻想，亦越嚟越重視港、台合作，繼上個月舉行分析兩岸新形勢記者會後，今日再由主席譚耀宗喺立法會提出動議辯論，促請特區政府推動兩岸關係解凍下嘅新機遇，又會學吓吳伯雄出訪咁，稍後會破天荒組團登陸台灣，約見國民黨、民進黨要員。
小馬哥接見機會微
民建聯此行統、獨通殺，除咗約見國民黨主席吳伯雄外，亦有約見民進黨新主席蔡英文，最終見唔見得成係未知之數，隨行嘅蔣麗芸Ann話，國民黨方面話如果主席唔得閒，會搵副主席關中或林豐正應酬佢哋，民進黨方面亦未落實會面安排，但肯定有人招呼佢哋。
民建聯雖然係香港第一大黨，但同國民黨、民進黨比較，真係小巫見大巫，如果遭當地朝、野兩黨冷待，都唔係奇怪嘅事，至於受到港人萬千寵愛嘅小馬哥，家陣貴人事忙，接見民建聯機會應該微乎其微，好彩立法院長王金平同台北市長郝龍斌都仲有機會。
阿Ann話小馬哥對內地態度溫和，兩岸關係平穩發展，長遠都有助港、台交流。而且小馬哥一上任就積極搞三通，為兩岸三地提供好多商貿機會，佢認為台灣長遠可以同華東、華南形成區域經濟圈，發展潛力強勁。阿Ann家族喺台灣做慣生意，佢頗熟悉台灣，對台灣科技生產印象尤深，今次會去參觀當地科技園。
國民黨、民進黨輪流執政，譚耀宗算有自知之明，自言民建聯只係「民間政治團體」，此行不談政治，只談經濟。民建聯認為港府應該把握機會推動港、台關係，八方認為香港政黨喺兩岸關係問題上抽吓水無妨，以為自己可以貢獻就太儍太天真，過去10年港、台官方關係不進則退，連港府都話唔到事，何況政黨？
民建聯訪問團成員一行九人，除咗有三個正、副主席，仲有曾鈺成、蔡菜子、楊孫西、楊耀忠、黃定光同盧文端，有幾個係老闆級人馬，台灣商人認為「馬上」經濟就好，唔少中資、外資近期對投資台灣興致勃勃，唔知民建聯有冇興趣去寶島發財？
mailto:[email protected]