翻拍「飛利篇」<br>《龍珠Z》邊打邊開古

翻拍「飛利篇」
《龍珠Z》邊打邊開古

仲記得《龍珠Z》最瘋狂年代，即使上緊堂，喺櫃桶底裝都唔識死；更喪者莫過於每個禮拜交十幾蚊「書簿費」，期期追看用人手抄寫嘅《少年Jump》日文繙譯版，仍睇得津津有味！點解呀？之咪係「飛利篇」嘅錯！全球《龍珠》迷，相信無一不受首次變成超級撒雅人嘅悟空所感動。今次，Game界再以呢段令人熱血沸騰嘅劇情，於PS3/XB360上足本重播：「飛利，去死啦！」

記者：陳國輝

打敵人開隱藏劇情

當各位仲回味緊《龍珠Z》劇情，都係時候醒醒喇！Game本身並無一套好完整嘅動畫，大家唔好搞錯，佢唔係一隻DVD嚟㗎！但如果你肯努力啲，例如預先進行複習，未睇過嘅人甚至要預早「咪書」，對劇情認識加深，隨時會成為爆機關鍵！《龍珠Z：爆發極限》本來係一隻格鬥Game，與之前玩慣嘅PSP或PS2版無異，但每打贏一仗後，今集你就有權選擇唔同嘅支線發展，而每一位角色嘅任務，亦同漫畫劇情一樣，所以睇咗漫畫先玩肯定有着數！另外，打贏咗敵人可開啓隱藏片段，即係話當你搞掂完美爆機嘅話，話唔定有個FullStory過你睇㗎！

■好多Fans覺得比達亦正亦邪嘅性格超正。

■今集嘅人物設定經過漫畫化，無之前咁3DLook。

■打緊嗰陣會出現唔同視覺效果，十足睇電影咁真實。

Online版武道大會

由於首度喺PS3/XB360機種上出現，所以同以往咁多代亦有好大出入！最明顯係畫質方面，今集採用高清輸出，特別當使出龜波氣功、元氣彈或者連續攻擊嗰陣，效果非常華麗；再者，喺打鬥時會加插好多過場動畫，所以話打機似睇戲就係咁解！另一樣更吸引Fans，就係今集追加咗OnlineBattle模式，只要將主機連網，你就可以同全世界《龍珠Z》玩家一較高下，約埋十幾個Friend齊齊Online，直頭可以自己整番個「天下一武道大會」，夠晒盞鬼！至於Win得越多，玩家仲有機會成為「Z」級終極高手㖭！