Skyline爆戰紋　ER34：給我敗吧！

R35近乎完美，玩開改裝嘅甩尾王阿Wing都話無乜好改，但同家族R34就唔同，基本上你唔會見到有直版喺街行，事關車主好難忍得住唔喪改一番，個個都可改成自己風格嘅Skyline；就好似阿Wing專登改嚟表演甩尾嘅ER34一樣，單睇車花已經好似白武男爆戰紋，向對手發出勝利宣言：給我敗吧！

記者：徐影龍
攝影：王文忠
Model：Kristy@NAZZ
鳴謝：Spec-R

解構戰紋

阿Wing提醒筆者，R34係四驅，佢嗰架係FR（尾轆），正確型號係ER34，明白晒！其實呢架ER34長駐大陸，陪住阿Wing巡迴表演及比賽，早前專登運嚟香港，為四川地震作賑災演出。「單係運費已經成兩萬，仲未計油費同翻執，同為中國人應該出一分力。」本來喺龍鼓灘Showoff完便運走，《Car通》當然把握機會，捉住阿Wing同佢架戰紋300影吓相。「啲戰紋係日本人幫我Design，我就好鍾意車身嘅螢光綠拉花，戰紋毋須太多，拉長幾條已經好有氣勢，將輪圈襯埋色，效果真係好突出。太高調？喺街行梗係高調喇，但我主要用嚟表演同比賽，越搶眼越好！」
車身上大量英文拉花又表代啲乜？「Spec-R係我公司名，其他都係Sponsor，好似Federal專出輪胎，𠵱家用緊嘅595RS-R喺街無得賣，專門Fit我哋要求而造，最大優點係輪胎磨出嚟會變粉狀，而且順住坑紋吹走，唔會一忽忽咁飛出嚟；SpeedMaster就係著名機油牌子，而P.MU即係制動專家Projectμ，佢哋都係首次贊助華人車手咋！」

■架車贏咗唔少盃賽，阿Wing錫到佢燶。

■戰紋由日本人操刀設計，幾條已夠嚇人。

■桶椅加四點式安全帶屬必備配件，Model坐落去貼貼服服郁唔到。

■全車英文都係Sponsor，冠軍果然不同。

■去到沙地如魚得水，喪飆、甩尾玩個不停。

除咗副偈乜都改

拉花係人都識，ER34骨子裏改得仲勁；首先換上ApecPowerFC電腦，令空燃比同點火時間更好，加上點火系統用PowerCable正極電壓線，電子點火效能比原裝更強，令280匹馬力提升至330匹！出奇地引擎反而無郁過：「我哋玩甩尾嘅較為着重耐用性，改得太勁好易冧偈，改周邊嘢仲實際。」
全車陣位貫滿Wurth車陣發泡膠，大大提升車架剛性，對甩尾、掟急彎有直接影響；底擔同雞髀亦作出強化，用上硬膠杯士，令轉向反應更直接。鮑魚用番老拍檔P.MU四遮式，仲係又輕又硬淨嘅鍛鋁合金，制動及散熱更有效，咁改法差不多要15萬。