車事情報局：<br>Volkswagen新陳列室　買車送保險

車事情報局：
Volkswagen新陳列室　買車送保險

我車報員成日聽同事Dennis講，話Volkswagen廠方接掌香港代理權後，首個喺灣仔開設嘅陳列室幾大幾靚，咁啱早兩日行開嗰頭，咪入去行個圈囉；點知喺入面竟然碰到佢哋嘅市場部朋友，佢唔只帶我行勻成個陳列室，仲話有單News託我話畀大家知㖭！

先講吓呢個佔地16,900平方尺兼號稱全港最大嘅汽車陳列室，地下主要係用作展覽新車，可同時擺放7款新車之餘，旁邊更設有休息區，等大家行得攰可以坐低休息吓，而一樓就係CustomerLounge，大家唔只可以同Sales傾吓買車嘅事宜、選購心水Volkswagen精品，更可以享用Cafe提供嘅美味咖啡同糕點，務求令Fans可以有一個輕鬆愉快嘅心情去睇車買車。

■Cafe內嘅糕點每星期更換，等Fans有新鮮感。

至於朋友想託我話畀大家聽嘅News，就係為咗慶祝廠方接掌代理權，由即日起去新陳列室選購任何車系，都可以享有首年保費全免優惠，但名額只係得100名，先到先得，送完就無；各位精打細算嘅Fans，買Volkswagen新車嗰陣，記得去新代理嘅喺灣仔道223至227號地下嘅陳列室啦！

記者：車報員

■優惠期間買任何車系，皆可享免保費優惠。