政府搞文化搞到一鑊粥，西九發展貽笑天下，但係並唔代表香港人冇文化，事關呢個爛鬼政府唔係香港人選出來嘅。講音樂，我哋有位鋼琴神童沈靖韜；講畫畫，我哋又有位新鮮熱辣少女畫神柳曉彤。16歲嘅曉彤剛剛喺馬其頓奪得少年繪畫界嘅奧林匹克冠軍，噚日載譽歸來。
導師劉浩昌陪同曉彤返港，曉彤嘅父母就來到接機。劉sir大讚柳氏夫婦係模範父母，仲爆曉彤天生異稟，周身刀張張利，除咗畫畫，游水溜冰都攞過獎。兩年前，劉sir同曉彤父母分析利害，建議曉彤集中時間磨好身上其中一把刀，畫畫有利於曉彤日後從事創造工作，於是父母全力支持愛女學畫畫。劉sir慨嘆，好多學生同父母都覺得畫畫唔知為乜，浪費唔少天才，希望曉彤嘅成功可以鼓勵更多少年畫神。