上個禮拜香港搞咗個大型名酒拍賣會，吸引唔少酒癡，當中點少得政務司司長唐英年，不過今次佢就冇投到紅酒，反而睇中咗兩支香檳，花咗13.4萬投得。噚日，唐英年家族持有嘅美維（3313）舉行股東會，司長細佬、執行主席唐慶年都有出席，華華梗唔放過追問佢有冇投到心水紅酒。
原來唐慶年嘅品味唔同大佬唐英年，佢唔鍾意紅酒，話紅酒係肥仔水，嫌佢落咗好多糖，比較鍾意飲威士忌。唐慶年仲話，保存威士忌都要講心思，因為威士忌打直放得耐會漏氣，打橫擺得耐又會揦爛樽蓋，所以每個禮拜都要換吓威士忌橫直嘅姿勢，咁先至唔會嘥咗支威士忌。至於唐慶年有乜威士忌珍藏？佢話冇，因為飲得好快。
不過，既然紅酒係肥仔水，咁鍾意飲紅酒嘅大佬唐英年應該會肥過唐慶年㗎，但事實又唔多似噃！