內衣品牌安莉芳（1388）由主席鄭敏泰同個女鄭碧浩，父女檔拍住做，安莉芳主席同行政總裁分家，阿女鄭碧浩做行政總裁，雖然佢係女性，對客人消費口味及習慣應該理解啲，但佢93年先加入安莉芳，喺呢行只係做咗15年左右，佢同華華講，爸爸喺行內做咗30幾年，經驗豐富過佢。
所以鄭碧浩好尊重爸爸講嘅嘢，話公司上嘅決策都係由爸爸決定，阿女負責執行，所以大家冇乜爭拗，最多只係將公事帶到飯枱上，食飯時攞出嚟傾吓，但就強調公事還公事，佢哋分得好清楚。
鄭碧浩又話，四川地震並未震到佢哋喺成都嘅零售點，因為啲零售點喺市中心，呢啲地方損毀冇咁嚴重，但就有十幾個員工嘅屋企，地震後變危樓，但慶幸冇傷亡，公司即時發放撫恤金，又捐咗百幾萬銀畀紅十字會。