倪匡、黃宇詩同李敏噚日喺銅鑼灣中央圖書館出席「第五屆香港讀書月」，佢哋同在場人士分享閱讀嘅心得。倪匡喺現場大受讀者歡迎，搞到個活動變成倪匡嘅簽名會。倪匡同馮仁昭講佢肥咗60磅，佢話：「我𠵱家食好少嘢，不過唔減肥啦，減又死，唔減又死，總之一個星期就會多個新病，年紀大係咁㗎啦，好似地震咁，小心都冇用，順其自然啦。」