【本報訊】日前誤將一名七旬婆婆「當賊辦」的百佳超級市場，昨日再有市民直指慘受同一遭遇。容女士上月底於百佳馬頭角分店被職員「老屈」偷取一包「已經買咗差唔多10日兼且食咗10幾粒，個包裝仲要又殘又舊」的香口珠，最後家人從家中翻出單據她才得以「獲釋」。有關職員事後只作口頭道歉，更召喚警員調解以「打發」她離開。
記者：鄧愷欣 雷子樂
上月23日在20多名市民面前被當作小偷的容慕定，是內地來港新移民，與丈夫及女兒居於馬頭角道，經常到附近百佳超市購物。她昨日向記者憶述事件時仍深感氣憤，坦言以後不會再到百佳任何分店購物：「香港咁多地方買嘢，做乜一定要去嗰度買！」她表示，當日傍晚6時多到該店閒逛，離開時未有購物，但經過門口的防盜板時卻發出響聲。店內一男職員上前查問並要求她再經過防盜板，但同樣發出響聲。「個職員要查我個手袋，當佢搵到包香口珠，又恃住行過兩次防盜板都有聲，就開始對我唔客氣。」
她向職員力稱，該售價7元的爽浪香草薄荷無糖香口珠25粒裝是於5月13日在該店購買，「我同佢講已經買咗成10日兼且食咗10幾粒，個包裝仲要又殘又舊！但佢都要問我攞單據證明，如果畀唔到就叫差人嚟！」
容女士指，當時她曾要求交出身份證回家找單據，但職員以「咁我即係放咗個賊走」為由而拒絕。最後她致電女兒求救，「店內有廿幾人排隊畀錢，我就好似個犯人咁，每個人行過都望住我，我覺得好羞家好醜，個個都以為我係賊！」
最後雖交出單據，但職員只向容女士說：「唔好意思，可能係個系統壞咗。」容女士更覺氣憤，要求店方書面道歉，以及在店內貼聲明澄清；但該店一名女主管卻要求容女士冷靜解決事件，「但係連我個女都識講：『你哋𠵱家寃枉我阿媽係賊喎，你叫佢點冷靜呀？』」
「只想百佳公開道歉」
該店其後報警，警方到場調解，「搞咗個幾鐘，連我老公都嚟埋，但差人都只係要百佳畀個投訴電話我就算。」容女士連續三天致電多次才有職員處理，但只獲一封道歉信。「我唔係話要乜嘢賠償，只係想百佳公開道歉，還我清白！」
百佳發言人回應表示，今次屬個別事件，相信屬誤會一場；百佳有指引予各同事處理有關問題。但基於保安理由，不便露透，防盜板為何會對已付款的貨品作出反應。
容女士被百佳當賊辦示意圖
你的意見?
●對百佳處理懷疑店舖盜竊的手法有何意見？
●你有購物時被當賊辦的經驗嗎？
請電郵至：mailto:[email protected]
或傳真至：23703283或發短訊至：60107999