合和（054）太子爺胡文新（Thomas）係冰球發燒友，噚日唔使返工，佢一早就到咗九龍灣MegaBox溜冰場，不過唔係自己玩，而係睇冰球賽，因為香港、澳門、北京同台北四地嘅業餘冰球隊喺香港打幾場慈善賽，籌錢捐畀四川地震災民。賽事主辦單位香港業餘冰球會（HKAHC），主席正係Thomas，加上今次有電視台直播，所以佢晨早到場打點。
雖則係慈善邀請賽，Thomas睇比賽時都好肉緊，尤其爭冠軍一場香港對北京隊，佢睇到跳跳紮，一時又蹲前昅實，高手當前，佢話打球癮起梗會有，而香港隊特訓期間，因為都喺夜晚，所以佢放工後就會去睇佢哋練習。雖然噚日場比賽香港輸咗畀北京，但佢大讚港隊有進步。
呢次比賽籌咗15萬銀善款，問到Thomas嚟緊仲會唔會搞籌款，或者身體力行去做啲嘢幫災民，佢就話個個都想親身去四川救災，但去到盞要人哋嘥資源招呼自己，為免幫倒忙，不如過一段時間先去幫手，總之同有關機構保持溝通，有需要先去幫手。又諗得幾細心喎！