放工時分，碰到OL陳挽住一袋物品，好似幾重吓，問佢為何挽袋挽得咁辛苦去迫地鐵。OL陳話：「係一個CD架，木製，一位朋友間公司搬寫字樓去深圳，將showroom（陳列室）貨品清貨大平賣，我朋友代買呢件CD架，五十蚊咋，外形好靚嘅。」
以為工廠搬廠去珠三角啫，香港成日話搞前舖後廠，如果寫字樓都搬埋去深圳，香港咪連文職人員服務職位都流失埋？唔怪得OL陳講講吓，有啲驚。佢話：「朋友間公司係美資，一向前舖後廠，寫字樓喺尖沙嘴，已經十幾年咯，連產品設計師、會計、銷售及IT部，請咗幾十人㗎。𠵱家美國總部話尖沙嘴租金升得太高太快，員工薪酬又開始加得多，於是下令全部搬去深圳，職員如果唔願到深圳返工，可申請遣散費。公司叫做唔錯㗎嘞，待人不薄，但朋友心理上硬係唔鍾意到深圳返工，現在心情好矛盾。」
香港做咗深圳教車師傅起碼二十年，現在內地白領文職人員供應量大增，人工與香港有一段距離，加上深圳工廠產品可直接經由鹽田/蛇口出口往美國，香港嘅利用價值減少晒咯，唔怪得OL陳驚住寫字樓及寫字樓工作北移，剩番高盛、摩根等大銀行/證券行留在中環與西九龍，令佢一類文員冇工做。
跟住見到一星期有四日在深圳瞓覺嘅代理K，代理K日日在深圳返工，一星期返香港住三晚，對深圳地產、生活場所瞭如指掌，周時叫左丁山上深圳搵佢。既然遇上，又諗起OL陳所言，於是問代理K：「到深圳返工有冇唔妥？」代理K話：「邊有唔妥呀，香港人初去，心理上唔習慣啫，需要一段時間適應。我喺深圳幾年，知道晒內地辦事作風，完全冇問題。因為了解得深，所以我叫人買樓，自己冇買樓！」代理K都算得幾絕，在深圳租樓唔買樓，主要係佢認為中國「地大勿博」，地方大，建築樓房多多都有，非特殊豪宅，價錢難升，所以佢只租不買，話內房股亦買唔過。內地房產公司借債比率較高，現正咬緊牙關咁捱，盡量按兵不動，希望到咗明年初，中央會放寬銀根啦。