新鴻基地產（016）郭氏兄弟反目，郭炳湘最後都保唔住主席兼行政總裁個位，只係留任非執董，郭老太鄺肖卿暫時頂上做非執行董事同主席，華華八到，老太雖然坐主席位，但都係「食個包、嘆杯茶，聽管理層滙報吓公司情況」。新地話晒大企業，成班管理層又做咗咁多年，唔使吓吓要老人家費心嘅！
不過，唔知係有心定巧合，新地「變天」，旗下公司都陸續有人事變動。當年三兄弟同心協力搞上市嘅新意網（8008）出咗通告，指蘇承德6月1號唔再做行政總裁，到7月連執董都唔做，由首席財務官詹榮傑暫時頂上做署理行政總裁，但就冇講頂幾耐。蘇承德只係40幾歲，唔通咁早退休？通告只係話「（蘇承德）打算用較多時間專注於尋求其他發展」。
新意網揸fit人坐唔耐
有心人可能會諗，係咪同郭氏兄弟內訌單嘢有關。不過，好多人都知新意網係炳聯嘅地盤，蘇承德亦係炳聯嘅人，所以唔似「大清洗」。不過，新意網行政總裁呢個位睇嚟都唔易做，新意網2000年初上市，起初一直由炳聯兼任行政總裁，但就有個董事總經理嘅位，第一任係幫新意網上市嘅許浩明，上市搞掂功成身退，由晏孝華接任，04年蘇承德就接佢棒，直至05年9月9號，炳聯將行政總裁個位過畀蘇承德，一直到𠵱家。
除咗新意網，新地持有嘅載通（062）之前亦有人事變動。本嚟喺載通做董事長嘅陳祖澤，今年4月退休轉任載通、九巴同龍運嘅非執行董事。本嚟陳祖澤都60歲有多，退休好正常，但喺郭炳湘早前嘅入稟狀度，就提到郭炳聯曾建議陳祖澤退休後，招攬佢做新地非執董，但郭炳湘就唔多贊成。
mailto:[email protected]