噚日朝早8點至10點港台第一台嘅《舊日的足跡》，原定播出有「紅色新聞兵」之稱嘅李振盛嘅錄音專訪，點知節目播到一半突然腰斬，之後個鐘就改為播歌，港台解釋係因為機件故障。但有聽眾即刻打畀八方，質疑個受訪者啱啱講完1988年嘅事迹，跟手應該會講89年，懷疑港台怕敏感所以中斷播放。
下星期再足本播放
六四就到，市民有咁嘅聯想都唔出奇。不過，《舊日的足跡》主持淑梅姐向八方解釋話，純粹係因為餅帶出現問題先暫停播出訪問，同內容冇關，仲話自己有另一個copy，拍心口保證下星期會足本播放。至於訪問中有冇提及六四事件，淑梅姐話印象中李sir只係提到六四時自己已經冇做記者，冇特別評論事件喎。雖然淑梅姐咁講，但港台咁嘅蝦碌都發生得，真係要好好檢討。事件亦可以反映，港台有啲聽眾至今毋忘八九。
講番李振盛，佢被譽為最具影響力嘅新聞攝影大師之一，喺節目中佢提到入行50年，最難忘文革期間，喺《黑龍江日報》做攝記時，秘密拍咗一批見證歷史血淚嘅圖片，批相到80年代先可以曝光，後來仲獲得嘉許，讚佢讓歷史告訴未來。