上個禮拜山頂纜車120周年紀念，賣大包3毫子坐一程，主禮嘅「小電王」大酒店（045）主席米高嘉道理帶埋老婆LadyBetty，同讀緊highschool嘅囝囝Phillip到場，米高嘉道理爆料，話阿仔為咗嚟慶祝，專登同學校請咗日事假。
嘉道理太太Betty同華華講，佢第一次坐山頂纜車，已經係27年前嘅事，當時佢連邊個係米高都唔知。結咗婚之後，老公雖則時不時都仲陪佢坐纜車，但已經少咗好多。
華華仲八到，Betty同米高嘅相識，都幾戲劇性，話說當年Betty踩上對方公司，話要搵嘉道理，公司嘅人就帶佢去見米高，後來先知Betty係想搵另一個家族成員，但就係呢次咁嘅偶然邂逅，令兩個互不相識嘅人走埋一齊，之後嘅事，唔使華華多講啦！