蘋果批Online
今天《蘋果批Online》五時開騷
Click入http://pie.appledaily.com收看
歡迎透過web-cam即時發表意見或致電29908648安排親身上場
電郵：mailto:[email protected]
網誌：http://pieatapple.wordpress.com
慷慨激昂上街的八九年大學生，因回歸心情變得複雜又迷惘的九七年大學生，到今天被高漲「愛國」情緒包圍的大學生，對六四都有不同的感受……
主持：楊卓華 高明輝
周澄：我估（大學生對六四）算係有淡化。好大眾嘅講法就係：六四可能真係唔啱，但係𠵱家中國已經有進步，我哋唔好再講呢啲嘢。我唔知咁算唔算係淡化，但係即使𠵱家中國已經有進步，我哋係咪唔追求六四屠城嘅責任呢？第二，好值得商榷嘅就係，究竟佢哋睇到嘅進步係邊一方面進步呢？
黃瑞紅：六四時，我讀中二。我入大學嗰時已有一個講法，如果六四唔鎮壓，可能中國會好亂，但嗰陣時始終仲係九七前後……去到𠵱家，再10年後，𠵱家年輕人，一來冇經歷過六四，佢哋腦中並冇電視機直播嘅流血畫面，同時又聽到有部份指鎮壓係合理嘅講法，又睇到中國經濟起飛、崛起，佢哋會更容易接受呢個講法。
蔡耀昌：當時香港有個前途問題，整個社會嘅氣氛包括學生，都比較關心前景。我哋對包括八九之前嘅幾次學潮，都幾關注，所以當時成個八九民運我哋都比較投入；𠵱家畢竟都經過咗19年，你可以話多元咗，我睇到一般學生個關注點可能比較分散。
黃瑞紅：我覺得近呢10年嘅年輕人最大問題係嗰種淡化嘅問題，冇經歷過、唔知、冇感受，唔覺得係一件好貼身好關佢哋事嘅嘢。佢哋真係冇感受，亦都好似好遙遠，所以好冷淡，但唔係刻意，對大部份嘅後生仔嚟講，呢個就係令我覺得佢哋對六四冇我哋咁緊要嘅原因。
周澄：𠵱家啲學生好多都覺得要關心中國，但我覺得方向可能有少少錯嘅。例如奧運嘅時候，佢哋都會好支持，覺得都應該一齊去迎接奧運聖火……佢哋可能並唔反對中國有人權，但（對六四）就唔係咁清楚
莊耀洸：隨住件事越來越耐，件事都好容易被淡化……但放長遠啲嚟睇，譬如話四川地震，都會諗番，點解發生啲咁嘅事？會唔會係管理上有問題……始終一個開放嘅社會，啲人都會思考番，其實個政府係咪有唔啱。
