想眼仔精精靈靈，睫毛液、睫毛夾，看來方便卻絕不簡單，多少人一時錯手眼妝盡毀推倒重來，多少人用力過度自斷毛毛；捨得花錢到美容院植眼睫毛，用膠水把假毛黏到真毛上，又要冒生瘡發炎的風險，效果也不持久。本港近年引入外科植眼睫毛技術，將頭髮毛囊植至眼皮，令睫毛更濃密修長；洗眉後變了「無眉人」的女士也可以此法令眉毛重現。 記者：張嘉雯
「呢個方法適合啲因為意外無咗睫毛、成日黐眼睫毛黐到真睫毛都甩晒、眉毛稀疏，又或者因為紋眉之後唔鍾意，用laser洗眉洗到毛囊唔再生嘅人。」
手術者局部麻醉
從事植髮手術的林澎醫生解釋，外科手術植睫毛及眉毛效果永久，「通常每邊植20條至60條已經有好明顯效果，眼皮始終比較脆弱，一次唔可以植太多，每次四至五個鐘頭到。」
一般人上眼簾有100條睫毛，下眼簾則有60條，接受手術者要接受局部麻醉，醫生會在其耳後或接近頸項位置切除一小塊頭皮，取出頭髮，細分成單一毛囊，再將已分好的單毛囊頭髮經特製的針植入眼皮，林澎說，「做嘅過程一定要就番佢生長嘅方向，唔係就好容易倒插。」手術後幾天，需以雙氧水消毒，「以後如果想睫毛鬈啲，應該用睫毛夾，唔好電，因為頭髮嘅texture同睫毛唔同，受電嘅效果唔及睫毛。」
眉毛方面，每次每邊需要植75至350條，女性的眉毛較為幼細，多由耳後方抽毛髮；男性的眉毛較粗，多由後尾枕位拿取。醫生會按病人要求的眉形植入頭髮，同樣需跟隨原有眉毛的生長方向。
需注意發炎風險
新植入的眉毛有部份會繼續生長，部份會於手術後兩星期脫落，再在兩至三個月後重新長出；由於植入的眉毛及睫毛會繼續生長，需定期修剪，「因為頭髮會生長，唔同睫毛眉毛，如果你唔剪，就會好似一眉道人咁越生越長。」經過一段時間後，新眉毛及睫毛的生長速度會逐漸減慢，被周圍原有的毛髮同化。
心郁郁的人要注意，植眉毛及睫毛會有發炎感染風險，尤其是取毛的頭皮位置較易發炎，如處理不當有更可能留有疤痕。