【本報訊】天災不可違，人禍最可恨。5.12大地震災後揭示的「豆腐渣」學校工程，暴露了內地的貪腐歪風，中央表示會嚴肅查處。19年前席捲全國的反貪腐運動，卻以血腥鎮壓告終。近千人昨日上街遊行，悼念當年為國捐軀的死難者。毋忘六四，哀悼5.12，愛國的心，原是一脈相承。 記者：蔡元貴、許偉賢、林俊謙
六四19周年紀念大遊行結合悼念四川大地震主題，遊行起步之前，先在維園默哀一分鐘，悼念六四及地震死難者，然後向政府總部出發。主辦遊行的支聯會在出發點及遊行路線沿途放置籌款箱，呼籲參加者捐款賑濟地震災民。支聯會表示，有990人參與遊行，警方則估計大約有600人，是歷來六四大遊行的新低。
沿途只播放民運歌曲
大會借來北京奧運的口號，今年以「同一世界，同一人權！同一夢想，平反六四！」作為口號。為了表達對地震及六四死難者的沉痛哀思，今年遊行以標語代替口號，以靜默代替吶喊，沿途只播放民運歌曲，參加者一起默默走過這條堅持了19年的路。
對於很多遊行人士來說，平反六四與悼念地震，都是同出於一顆關愛家國的良心。從蘇州移民來港多年的酈女士，八九民運時期以大學生身份參加了反貪腐運動，六四後被拘留，接受了幾個月的「思想清理」，畢業後還分配不到工作。她惟有南下深圳做民工，並於93年移民來港。酈女士遊行前捐了100元賑災，她說：「四川地震令我好悲痛，特別係豆腐渣工程，令我對當權者嘅腐敗好痛恨，更加要出來行。」
國家領導人在四川震災中表現出親民及開明的作風，並親臨現場指揮救災，又容許境外傳媒採訪。但遊行人士周先生仍對北京政府有保留：「領導人喺地震後表現得好有誠意，但係我懷疑佢哋係出於政治需要，向國際社會表態。」任職語言治療師的馮小姐也質疑：「北京政府係唔係喺大災難嘅時候先咁開明？以後有反對聲音，能唔能夠容忍？」
律師棄厚薪來港生活
遊行隊伍中，有好幾位內地人士。俞小姐兩年前從浙江來港從事律師行工作，昨日首次參加六四遊行：「這是中國土地上唯一有遊行自由的地方，如果我這樣也不珍惜，更不用說要平反六四了。」她說，維權律師在內地受到打壓，她寧願來港當律師樓文員，犧牲在內地當律師的更高薪金，也不願在惡劣的政治環境下生活。
對於遊行的自由，新加坡《海峽時報》高級撰稿員程翔也有一番體會。他過去三年身陷牢獄，不能參加悼念六四的活動，昨日終可再次踏上這條路。程翔說，無論爭取平反六四或者為四川賑災，出發點都是愛國：「都係希望中國好、中國進步，希望中國可以少啲災難。」
遊行約於5時結束，支聯會主席司徒華在政府總部發表宣言：「血濃於水，遠在19年前、同最近發生嘅事件，都使我哋同樣地感到無限悲痛！」他其後被記者問及，為何六四遊行要加入地震主題，他解釋，四川地震天災當中，有人禍成份：「天災不可違，人為最可恨。豆腐渣工程學校壓死咁多學生，就係人禍；減少人禍，人民嘅災難就會減少。六四就係人禍，當年民運人士反官倒、要民主，點解兩者無關？」
支聯會籌10萬元賑災
支聯會代表表示，遊行籌得近4萬元，連同早前街站所得的善款，至今籌得近10萬元，該會稍後會將善款連同六四燭光集會籌得的款項，捐予香港紅十字會作賑災用途。支聯會呼籲，本周三晚上8時，維園足球場上再次燃起燭光，展示一起抗衡天災，抗衡人禍的決心。
遊行人士心聲
再唔參加
運動就會dieout
陳先生（教師）：「六四嗰年我得9歲，但好彩爸爸都話畀我聽發生緊乜嘢事。我幾乎年年參加六四（悼念）活動，尤其喺最艱難嘅時候，大家就最唔可以放棄！好似05年前特首董建華落台後，民主派被邊緣化、平反六四嘅聲音亦一樣被邊緣化。如果我哋再唔參加，個運動就會dieout。
其實我哋唔係同中國政府有仇，只係希望佢哋可以開放啲，令個社會可以更加進步。」
教育囝囝
冀望中國進步
羅先生：「過去一直都關心四川災情，但喺其他地方已經捐過錢，所以今日參加遊行最重要唔係捐錢，而係教育囝囝六四係乜嘢。雖然囝囝𠵱家只有7歲，但我會話畀佢聽，今日參加遊行嘅意義係好簡單，就係中國政府喺19年前做錯咗啲事，但19年後嘅今日仍然未道歉，我哋今日行出嚟，就係想中國政府道歉，日後能夠繼續進步。」
新傷舊痛
需要時間治療
葉女士（退休義工）：「19年嚟，我年年都參加（六四悼念活動）。就算呢幾年關心六四嘅人少咗，但唔緊要，因為六四傷痛嘅血，仲喺某啲人心裏流緊。
作為媽媽，我明白所有天安門母親嘅傷痛，所以我好尊重丁子霖（天安門母親運動發起人）話，中國政府恩恤六四死難者家屬，可以暫時放下六四爭議。六四同四川地震唔同，地震過後捐咗錢就可以重建，但六四事件，如果我哋唔出嚟有啲行動，就一定平反唔到。我為四川災民痛哭，亦為六四學子痛哭，呢啲新傷、舊痛，需要時間去治療。」
飲少餐茶
幫助四川災民
林先生（退休人士）：「過去每年我都會參加支聯會搞嘅六四遊行，今年遊行加入咗為四川大地震災民賑災嘅主題，我覺得好好，好合理，因為兩者都不過係想國家好。雖然我𠵱家退咗休，但我每逢見到捐款箱都會捐錢，就算只係捐20元都好，最多之後咪飲少餐茶補番數囉，最緊要係幫到災區嘅災民。」
