新任副局長原來係「聯合國部隊」風波擾攘個幾星期後，龜縮多日嘅煲呔終於露面，噚日喺上海首次就事件解畫。好多人批評成個制度無規無矩，好似煲呔請家僕，由心腹陳德霖一手包辦講咗就算，成件事黑箱作業，挑選、評核準則毫無透明度，就連煲呔出面解畫，都要「暗中」進行。
煲呔繼續死唔認錯
由於副局長日內就正式返工，為免國籍風波糾纏不休，煲呔身在上海都要急急「撲火」，噚日喺港府駐上海經濟貿易辦事處見記者。
唔知係巧合定天意。有記者問到煲呔，佢同特首辦主任陳德霖兩人係咪錯估政治形勢，有冇覺得自己做得唔好甚至失職時，現場部份燈光突然熄滅，在場官員表情愕然，因為唔知發生乜事，記者更加錯愕，懷疑煲呔習慣黑箱作業，挑選副局長黑幕重重，唔通解畫都要摸黑發言？既然認為自己做得啱，法、理、情都過到關，又何懼光明正大講個明白呢？
記者會冇理由「黑媽媽」舉行，在場記者亦唔容許官員「暗中」解畫，同意開番燈後，要煲呔對住燈火向市民交代。兩、三分鐘後，燈光問題終於恢復正常，不過在明在暗，煲呔都係繼續死唔認錯，強調副局長有外國籍冇問題，一刀切要求高官放棄外籍，隨時牽連其他高級公務員。
小圈子產物多風波
煲呔咁講擺明靠嚇，因為《基本法》無規限高官國籍，如果佢哋升做局長，自然就要抉擇，副局長係政治任命，揀「外國人」插隊卻係煲呔話事，香港地用人唯才，八方唔認為市民對外國籍人士有偏見，有咁大反應，唔通真係驚呢班人「賣港」？其實係睇唔過眼煲呔一言堂啫。
煲呔噚日講啲唔講啲，冇披露個別副局長、政治助理幾錢人工，辯稱唔想引起不必要比較。副局長、政治助理由公帑出糧，納稅人有知情權，何況其他官員、以至特首人工都唔係秘密，點解新貴有特權？
市民知道副局長薪酬唔係想八卦比較，而係要判斷有關人士係咪值得收十幾廿萬元一個月，有能者收多啲無人異議，物非所值點解要納稅人埋單呢？
副局長未埋位就風波不斷，歸根究柢，因為特首都係小圈子選舉產物，由佢催生嘅政治插班生制度先天不足，係畸嬰怪胎，不足為奇。
mailto:[email protected]