好多香港人擁有外國護照，舉個簡單例子，我哋成班老友喺星期一坐埋一齊飲茶，八人之中，便有澳洲籍四人，加拿大籍一人，居英權二人，如果八個副局長持有外國護照/居留權嘅比例，與我哋相同，一啲都唔稀奇。
經過連番爭論，副局長係外籍人士，已知不是法律問題，既然基本法冇講，大家可以算數，但此乃政治觸覺問題，政府避不了。公關專家A講，香港人，由政府以至大企業，不重視公關，未出事之前，必定先諮詢律師，問法律意見，律師話冇問題，老闆或話事人就會去馬。出咗事呢，就搵公關出馬，試圖spin傳媒（或找傳媒做所謂背景簡報，解釋一番），如果不得逞，就索性不理；在話事人心目中，香港每日咁多事情發生，報紙電台唔會日日窮追猛打嘅，拖得十日八日，傳媒就會貪新厭舊，不再追打，可以過骨啦。呢個應變方法有時掂、有時唔掂，不可一概而論。以副局長護照議題為例，特區政府最初要所有副局長封口，躲在個人私隱呢個擋箭牌後面，就成為失敗公關範例。
公關A指出，假如特區政府宣佈委任副局長之日，集齊八位副局長見傳媒，主動提出基本法內無條文限制副局長（寫基本法之時，冇副局長呢個職銜）之國籍，政府徵詢過法律意見後，認為冇問題，但各位副局長可以主動披露自己持有甚麼護照，咁樣自動「引爆」法，公眾嘅反應可能冇咁大，而且副局長各人唔會再受傳媒追問嘅壓力，齊齊過關。
公關A是否馬後炮，大家或有不同意見。現在蘇錦樑宣佈放棄加籍，係政治正確做法，真正加拿大人或者唔高興都由得佢哋咯。事實上，大部份持有外國護照之人，當外國護照為一種方便，並無效忠加拿大、美國、澳洲、英國之心，即所謂香港式精仔精女心態，想從政呀，笨少少，放棄外國護照至係正路。