謝霆鋒早前喺泰國拍攝電影《風雲II》，太太張栢芝專程抱囝囝Lucas探班；近日霆鋒喺香港趕拍新片《証人》，同去賑災，出名黐身嘅栢芝偏偏唔見人，夫妻關係確實係耐人尋味。
外賣焗飯捽手
日前霆鋒拍《証》片撞車戲，栢芝未有到場探班。前晚霆鋒去灣仔星街垃圾收集站拍攝執垃圾戲份，栢芝同樣唔見蹤影，患有哮喘病嘅霆鋒為撲奶粉錢，要喺臭氣熏天嘅垃圾房內焗一個鐘，真係好難受，令佢全程出現輕微呼吸困難，胸口不停起伏。
霆鋒喺片中飾演便衣探員，前晚佢身穿染血恤衫，額角貼咗膠布，劇情講述佢去垃圾房搜尋證物，要發茅摷垃圾，其間導演話霆鋒對手太亁淨，要求佢加強污糟感覺，霆鋒竟將一個外賣焗飯倒落雙手，連飯帶餸汁狂捽一番後再入垃圾堆摷嘢，其後佢又拍攝掃地鏡頭，搞到塵土飛揚，相當唔衞生。
忽以英語講古
拍完呢場戲，霆鋒即時洗手清潔，佢離場時已經滿面倦容，問佢係咪因為哮喘覺得呼吸困難？佢話：「我冇事，多謝關心。」之後佢上車返屋企休息。唞咗一晚嘅霆鋒，噚日去到西九龍中天地參演《演藝界512關愛行動》大滙演，為四川災民出一分力，不過栢芝繼續唔見影。向來出位嘅霆鋒上台講出災區有兩頭義犬唔停狂吠令老婆婆獲救嘅感人故事，本來好哋哋，但唔知做乜佢忽然轉講英語，令情況有點突兀。