Hea得老尖Cafe嘅人都比較鍾意吹水，吹到疲就玩Boardgame助興。波子棋、Jenga（層層叠）、大富翁玩一鋪已經夠Hea幾粒鐘，越玩越興奮，拍枱、尖叫少不免，玩到幾嘈都無有怕，呢啲咪叫好Hea囉。
記者：洪偉順
攝影：周旭文
模特兒：Winnie、BabyTang@StageModels
老尖篇
1.富歐陸氣息
「St.PeterCity」，尖嘴一間好歐陸Feel嘅上樓Cafe，老闆叫Peter，後生細仔，唔係聖人，不過對古典歐陸家居設計有研究，專搜羅歐式椅桌佈置Cafe。佢話：「班熟客同我講，話霸住張咁有古典Feel嘅枱玩Boardgame，超有決戰快感，玩起嚟特別認真喎。」為免騷擾到隔籬鄰舍，店方已經加裝隔音設備，不過依然試過因為尖叫太勁，搞到樓上啲人走落嚟睇吓乜事，呢間Cafe六成客係女仔，高分貝隨時震爆玻璃。
（地址：尖沙嘴金馬倫道16號金馬大廈2樓B室/31789778）
新西蘭迷迭香元盛羊扒$88，羊扒鮮嫩羶味少；配清爽薄荷莫卡咖啡$36，夠解渴。
2.最啱包場玩
洗咁多晚樓，「DYClubCafeGallery」面積最大，質得落72人，包場最掂，仲有埋樂器提供，好多明星都曾經喺呢間場開過慶功宴，陳豪、鄭元暢都留低過腳毛。
（地址：尖沙嘴金馬倫道18號萬勤商業大廈2樓B座/23672188）
海味雞翼$48，先去骨，塞肉碎同冬菇，再浸麥芽糖炸，外脆內軟；金盞飄香$38，成份有茉莉花同金盞花，有舒緩情緒功效。
3.美女大廚坐鎮
「Mercury」老闆兼大廚Niki，靚女唔係得個殼，廚技好精湛，強項煮意粉，校嘢飲一樣耍家。一得閒，就會落場同熟客玩Boardgame。
（地址：尖沙嘴加連威老道37號1樓/63829130）
三文魚忌廉汁蘑菇意粉$40，忌廉汁同煙三文魚好夾；玫瑰鮮奶咖啡$32，微澀帶甜，滑到自動跣入喉嚨。
4.最掂螺絲粉
初頭以為「QuandoCafe」面積細細，睇真先知原來有個木地板大露台，露台面積比大堂仲大。唔嫌熱，不妨曬住月光玩Boardgame。仲有，試過咁多間Cafe，我覺得呢間碟螺絲粉最掂。
（地址：尖沙嘴加連威老道41號嘉威大廈4樓B/91083785）
白汁粟米蜆肉螺絲粉$68，螺絲粉彈牙到震，蜆肉好鮮甜；曲奇咖啡沙冰$45，飲一啖咬一啖餅，又係盞鬼啫。
5.狗仔任影
「米克諾斯咖啡」過癮在有三隻精乖狗仔，老闆楊生愛犬，任影唔嬲。呢間場人氣夠旺，求其搭兩句嗲就有人陪你玩Boardgame。
（地址：尖沙嘴加連威老道30號3樓/23686816）
忌廉拿破崙螺絲粉$45，螺絲粉索晒汁超惹味；墨西哥三色咖啡$34，由上至下分別係咖啡、薄荷同蜜糖，有齊苦、清同甜三重口感。
次次都會玩一至兩小時Jenga，夠刺激。
我最鍾意玩猜猜畫畫，可以多啲思考。
我鍾意玩大富翁，可以過吓有錢佬癮。
我Buy妙探尋兇，唔會咁嘈。
次次到Cafe，都會同朋友玩酒店大亨。
鍾意Jenga因為可以大叫。
都鍾意Jenga，可以一班人玩。
