葛民輝演出林海峰（阿Jan）講唱會首場時心臟不適送院，至今仍留醫，前晚阿Jan尾場騷時，播出阿葛在醫院與護士的合照，只見他要以心電儀監察心跳頻率，但與護士合照仍表現雀躍，阿Jan取笑他與護士玩得很高興，心跳強烈過見他的時候。
林海峰一連四場的「ENCOREALWAYSON林海峰是但噏求其大合唱PARTII」前晚在紅館結束，阿Jan於昨晚加演一場義演版，門票收益不扣除開支全數撥捐四川賑災之用。
青龍圖案仍未洗
阿Jan拍檔葛民輝在首晚高山青龍部份任嘉賓，因心臟不適被送院，至今仍留醫，前晚阿Jan特地在高山青龍環節時，播出阿葛在醫院的三張相片，只見他躺在床上，身上的高山青龍圖案仍未清洗，並接駁着心電儀，相信是他心臟出問題後，用來測量其心跳頻率之用，三名護士靠着床邊與他合照。阿葛看來精神不俗，且有點雀躍，大會以林兔公仔遮去護士面容。
阿Jan說：「佢冇事，同啲護士玩得好高興，三個照顧一個，好似一王三后，大家好關心佢想去探佢，不如做啲有意義嘅嘢，去探四川災民，放心，佢會好快亮相。」
事後阿Jan在後台接受訪問，他謂阿葛給了他字條及花籃，叫他放心，並指演出太rock才出事，至於照片是當天下午拍攝的，有傳阿葛患上心肌梗塞，阿Jan避談說：「我問佢時，佢都瞓咗，佢只答護士嘢，我問就唔答，可能要扮護士佢先肯講。」
談到阿葛要用心電儀，阿Jan說：「佢見到護士就跳得好快，見我時條線就好平。」是否阿Jan要求阿葛發相安撫fans？他笑說：「佢主動畀我，叫我安心做騷，安心上路。」問阿葛何時可出院，阿Jan說：「佢家姐都話佢八至十年冇瞓過覺啦，𠵱家要補充體力。」是否要通波仔？阿Jan說：「唔止，加埋七、八間報館寫嘅，有七、八樣嘢咁多，我就見佢冇事。佢家姐話佢想prisonbreak呀，所以出禁制令要佢休息，我有時間會去探佢。」
健康緊要過做騷
問阿Jan演出少了阿葛，會否很失望，他說：「最重要身體健康，做多一場做少一場都冇所謂，佢冇事就冇問題。」阿Jan現時是否覺得阿葛很重要？他說：「朋友講緣份，好似上世注定咗，我哋走唔甩，有段時間分開咗各有各忙，好少溝通，點知夾番埋又有啲嘢出嚟。」
此外，阿Jan父母、姊姊林珊珊、弟弟林曉峰一家及陳奕迅前晚均有捧場，談到阿Jan女兒也有捧場，但他卻為粗口話題解畫說：「喺街都好多人講，所以要家長指引囉。」
採訪：王連連
攝影：陳順禎
