好多女士都一擲千金購買名牌護膚品，但係究竟呢類產品幾有效，真係見仁見智。最近喺澳洲一個皮膚科學術會議上，澳洲皮膚科學會嘅專家PhillipArtemi醫生就提出，用防曬產品護膚，效果重好過價值幾百蚊嘅昂貴護膚品嘅新概念，防曬產品平貴無拘，就算只售30幾蚊港幣嘅防曬乳液，護膚功效也毫不遜色。
深入肌膚從無驗證
女士成日為護膚問題煩惱，好多人會問究竟要做幾多個護膚程序先夠，PhillipArtemi醫生就話「兩個就夠晒數」，首先係用傳統無泡嘅洗面梘洗面，可以每日一至兩次，然後就搽一層薄薄嘅防曬乳液，防曬度數唔使太高，大約SPF15至20度，已經可以保護到皮膚唔怕提早老化。
好多名牌化妝品都吹噓護膚品可以深入肌膚底層，又話會活化細胞，令肌膚再生，呢啲咁高深嘅理論，聽就好神奇，但實際係咪有用就無人驗證過。PhillipArtemi踢爆好多理論都只係實驗室有效，無做過人體測試，係實驗室嘅成效去到皮膚可能得番一成都唔夠，加上係實驗室可能用好高濃度嚟測試，效果梗係好，但去到護膚產品濃度就稀釋好多，好似聲稱可預防皮膚老化嘅抗氧化物（antioxidants）同維他命A酸（retinoicacid），好多時根本唔能夠滲入皮膚深層，點會有效果。
其實太陽嘅紫外線係令皮膚老化最大原因，皮膚也有自動清潔功能，毛孔唔係咁容易擴大同阻塞，所以平價嘅洗面用品同貴價牌子唔差得太遠，最緊要喺戶外做好防曬，少曬太陽至係保持肌膚嫩滑嘅好方法。
blog主：醫神