正出訪歐洲嘅鬍鬚曾不忘喺佢嘅網誌寫文，話自己身處歐洲，有點羅曼蒂克嘅想法，問：「如果我是俠盜鬍鬚曾，又會怎樣準備我下一份財政預算案呢？」各位市民唔好以為鬍鬚曾諗住劫富濟貧，佢忽發奇想，只係因為佢接受港台節目《打開書櫃》訪問，講到俠義精神與社會公義，令佢諗番後生時追讀報紙連載武俠小說嘅日子。
佢話，嗰時會剪低個框框，貼喺拍紙簿，得閒拎番出嚟回味。對於小說裏面描寫嘅綠林人物，鬍鬚曾認為，呢啲俠盜喺亂世時政府積弱下，以個人意念分配社會資源，但現代開明公義嘅社會不可能容忍佢哋嘅存在，因為𠵱家講求法治制度，通過透明嘅機制，將資源公平用於社會各階層喎。