為咗悼念六四兼為四川賑災，噚日「女長毛」雷玉蓮再次出動，拍住抬棺材嘅「長毛」梁國雄，參加支聯會嘅民主愛國大遊行。八方睇到「女長毛」遊行時揸住一大塊板，上面放咗幾條不明物體，砌成「四川」兩個大字，忍唔住上前搵佢問個清楚。 女長毛話，佢包糭有一手，見端午節快到，所以決定將屋企包糭用剩嘅竹葉，嚟一次藝術創作，砌咗「四川」兩隻大字，希望呼籲市民喺端午節食糭同扒龍舟之餘，仲要記得幫手為四川大地震賑災，佢自己最近亦頻頻出動，幫唔同籌款團體做義工，實行幫得幾多就幫幾多喎。