四川災後急需物資，自由黨都攞咗800幾份禮物出嚟義賣賑災，噚日率先喺沙田擺檔，田少兩兄弟都有喺街上叫賣。原來田少仲私人捐咗150萬買咗1,500個帳篷去災區，等災民有瓦遮頭。
坊間對黃以謙退黨議論紛紛，田氏兄弟似乎冇佢咁好氣。田少話一直知道黃以謙想喺立法會醫學界出選，但發現佢支持度唔係幾得，冇謂夾硬嚟，上周三知道黃以謙話要退黨時都冇挽留佢，仲好大方咁預祝佢成功㖭。
搶咗黃以謙個位、做咗九西支部主席嘅田二少都話，覺得參選都要睇民調掂唔掂㗎，好似佢咁支持度有番咁上下先至考慮去馬，仲話黃以謙喺區內一直好少服務，對自己參選工作影響唔大，睇嚟黃以謙退黨真係好有理由。