【番禺直擊】洪金寶是廿四孝老竇也是體貼好拍檔，他昨日透露準備退休前開戲讓愛子洪天明做男主角，近日他在番禺拍戲，則晚晚煲湯及煮消夜給同劇演員，受惠的應采兒則謂不會偷師煮給男友陳小春吃，她說：「我唔輕易下廚，過時過節就得。」
吳建豪、應采兒、洪金寶、樊少皇、梁小龍及日本演員加護亞依昨日在廣州番禺出席新戲《功夫廚神》記者會，開始時眾人先為四川地震死難者默哀，吳建豪與梁小龍沒有除帽，但吳做出兩手掌向天動作，他表示這代表為死難者及災民祝禱。後來眾人分享拍戲時的趣事與感受，在內地拍戲一個月，加護亞依透過繙譯表示十分開心，應采兒則謂有洪金寶的湯水及消夜照料，十分愉快，她謂：「大哥（洪金寶）返咗香港三日，我晚晚冇啖好食呀。」
促天明勤加練功
事後應采兒謂要再拍多三個月左右才能返港，男友陳小春正在橫店拍戲，二人聚少離多，問她可有向洪金寶請教廚藝慰男友？采兒連說三聲「No」，又謂：「我唔輕易下廚，等陣佢吓吓要我落廚呀，過時過節就得，佢都未試過煮嘢畀我食㗎，真過份。」洪金寶表示很愛大班人一起吃飯的氣氛，故每次煮食都會邀請工作人員一起分享。
問洪金寶年輕演員拍打戲的表現如何？他說：「冇留意，我只係演員，冇資格批評，講真實唔夠我哋好，佢哋𠵱家生活幸福未捱過，我叫天明練功，佢只話哦！」問他會否督促天明多些練功，洪金寶說：「佢𠵱家仲係二三線演員，擔正做主角就自然會勤力啦，我都有同佢講要練定，我退休前會開部戲畀佢擔正，或者度身訂做啦。」
應接受莎朗道歉
談到賑災，問洪金寶會否捐出家中珍藏鮑魚拍賣，他笑說：「我屋企冇鮑魚，有都食晒啦，我屋企最多垃圾，其實捐十蚊又好，一百蚊又好，都係誠意，要有心幫人，難得中國人咁團結。」至於莎朗史東（SharonStone）的因果論，洪金寶謂：「佢唔係中國人，對中國一知半解甚至唔知，佢唔可以咁講嘢，但既然人哋道咗歉，就一定要接受，做人應該大量啲，佢唔係殺咗人，雖然唔知佢道歉係真心定受壓，講咗就接受囉。」
應采兒對此則表示，莎朗的因果論使其電影及廣告受影響也是報應，她說：「天災同報應係兩回事，都唔知佢點解咁講，好無知，影響美國㖭呀，不過佢除咗道歉都唔知仲做到啲乜，佢小心啲呀，落美國唐人街，小心俾人打呀。」
採訪、攝影：曾小嘉
