葉翠翠同呂慧儀噚日以電視遊戲中嘅角色造型，出席喺圓方商場舉行嘅一個遊戲活動。佢哋打扮性感，葉翠翠露背，而呂慧儀因為着咗透視低胸裝，所以比較突出有睇頭，二人同樣吸引到好多男性攝影發燒友到場欣賞。
若隱若現最靚
呂慧儀低胸搶鏡，但係佢好謙咁話覺得葉翠翠較有睇頭，佢話：「翠翠件衫性感過我好多，我件衫只係若隱若現，不過我覺得都係若隱若現好啲，但翠翠就着得好靚好好睇，條裙好靚襯佢。」
呂慧儀仲話為咗工作唔會有性感底線，但係就拒絕影全裸相，佢話：「我未去到呢個階段，未衝破心理關口，但為咗做嘢會盡量配合。」而今次性感更換嚟5位數字酬勞，佢話相當滿意。
另外，記者話呂慧儀比較性感搶鏡，翠翠話：「冇所謂啦，佢嘅身形真係好啲嘅，搶鏡啲都好正常，設計師做呢件衫，重點係喺後面。」現場好多男士爭相影相，翠翠話已做足安全措施，佢話：「我唔係真空上陣，同埋用咗膠紙，出盡咗九牛二虎之力去遮住，所以唔驚會走光。」