九龍城區議員黃以謙噚日突然發出公開聲明，表示已經退出自由黨及辭去黨內職務。有人指由於自由黨不支持佢出選醫學界，所以佢憤然退黨；亦有消息話佢係不滿自由黨唔薦佢做副局長，一怒之下脫黨。
黃以謙稱自由黨不熱衷副局長制人所共知，加上佢係區議員，唔係煲呔想搵嘅人，所以從未奢望加入政府，又強調雖然自由黨冇表態支持佢出選醫學界，但亦冇正式反對，只係佢覺得自由黨代表唔到醫生聲音，退黨參選發揮空間較大。
據了解，黃以謙應該係喺田二少空降九西後先積極考慮退黨，因為佢係創黨黨員，從政多年一直冇機會更上層樓，既然個黨視佢可有可無，不如回復自由身。