「白花油王子」顏福偉月前因非禮的士司機被判社會服務令後，一直罕有公開露面，閉關多時，八方收到風，福仔終於重出江湖，今日蒲頭。
出席演藝界大滙演
福仔身邊朋友報料，指今日係福仔好友劉思蔚細佬新婚之喜，一對新人喺君悅酒店擺酒，據講福仔可能喺婚宴上獻唱助興。劉思蔚喺非禮案中，曾經幫福仔出庭做證人，福仔喺03年案發當日出席佢嘅婚宴，劉思蔚有義氣為好友提供不在場證據，不過法官最後冇接納佢嘅證供，判福仔有罪。
有時世事嘅嘢，就係咁巧合，事關劉思蔚當年都係喺君悅擺酒，當晚福仔亦有大展歌喉，點知婚宴後就發生咗鹹豬手的士司機事件。八方問福仔對去飲兼唱歌有冇陰影，佢話今次真係對唔住朋友，因為今日要出席「演藝界512關愛行動」大滙演，為四川災民出一分力，只好甩老友底，至於會否唱佢首本名曲《愛多八十年》，佢話一切待大會安排。福仔唔去飲應該係明智決定，身體力行做善事，怕且唔會再做錯事嘞啩。