去過嘉道理農場參觀嘅朋友，一定認得呢隻大嚿飯。佢個大名叫「仔仔」，係嘉道理鎮場之寶，亦都好可能係香港開埠以來最年老嘅家豬。老饕一定會覺得農場好大嘥，咁好肉地嘅大花豬做乜唔嗱嗱臨劏咗佢燉湯炆扣肉？偏偏嘉道理嘥咁多米飯養大佢，就係為咗勸勉世人少殺生少食肉。
原意為助農友配種
噚日係仔仔10歲大壽嘅好日子，據講香港嘅家豬最多養到兩歲就要劏，所以能夠活到10歲，仲見證埋香港回歸10周年嘅家豬，恐怕只此一隻。嘉道理農場成立初期嘅目的，係幫助農友謀生，所以當年會專門培育一啲優質靚豬，送畀農友打種，仔仔就係咁樣培養出來。
時移世易，香港養豬業式微，唔再需要嘉道理扶持，於是仔仔同佢嗰十隻「仔仔仔」都可以逃過俾人劏嘅厄運，仲可以留喺農場頤養天年。日久生情，嘉道理嘅上下員工已經做咗仔仔嘅好朋友，噚日仲特登整咗件雜菜生日蛋糕同佢慶祝。噚日唔得閒出席生日party都唔緊要，除咗公眾假期，嘉道理農場日日都會開放，收費10蚊。去到豬舍，記住同佢打招呼，叫佢仔仔，佢真係識聽㗎。