馬詩慧及歐陽妙芝前晚在中環出席法國廚具Cristel活動，任代言人的蘇施黃更即場炮製薑汁撞奶。馬詩慧家有傭人，但她表示多數由自己下廚，她說：「我每餐都三餸一湯㗎，工人唔係好識煮，啲細路鍾意食我煮嘅餸。」馬詩慧早前被影到出入均以小巴代步，十分慳家，她說：「我日日都坐小巴，唔係大使又唔係慳家，因為Michael（王敏德）俾人停牌三個月，六月先再揸得車，我自己又唔鍾意揸，冇所謂。」
冇心減肥
對於丈夫王敏德出唱片又花錢揸直升機，開銷是否很大？馬詩慧說：「佢唔係細路，好難控制佢嘅花費，何況啲錢係佢搵。」歐陽妙芝則謂心繫兩個囝囝，冇心收身減肥及出席活動，她說：「近期少見記者，今日都唔慣，我成日掛住兩條人命，不過真係好enjoy睇住佢哋長大。」
採訪、攝影：顏英儀