港交所（388）搞出個收市時段競價，唔到一個星期剛好遇着摩指換馬，搞到啲股票收市價七國咁亂，港交所要負上最大責任。一向以來，開市時段造出天價，一般成交都唔會好大，有心造價亦唔敢造得太離譜，因為會相當顯眼，但係收市造價，卻可以大條道理話係有成交支持的競價交易，有噚日咁離譜嘅先例，大戶日後要玩收市價，可以造到出晒面。
由於摩指涉及唔少股票換馬，噚日不少被剔出的股票備受牽連，好似長期係咁跌嘅湖南有色（2626）收市價突被質低十多巴仙，令股價創出新低，揸貨嘅股民自然唔多好受，最弊係若然有圖表派跟圖炒股，好多圖表噚日都會變晒形，即使下周一修正番，個圖仍然變唔番，造成永久性的「怪圖」。
任由大戶予取予攜
湖南有色最後時段「破位」向下，不妨又留意另一隻股票香格里拉（069），噚日最後一刻「嘜」高3.10元，競價成交達150萬股，成交額近4000萬銀，純睇日線圖表，根本係向上突破形態，事實卻未必。日後股票有心造上，大可在最後一刻才造價，翌日急升，大條道理話係技術破位。港交所班高層，究竟識唔識市場運作？
除咗收市競價時段無現貨成交參考可以亂咁嚟，查實期指亦然，再延長15分鐘後，大戶只要有心玩價，係可以令期指大升大跌，因為無現貨參考，若配合外圍些少變化，可以喺呢段時間挾上挾落，散戶諗住擺期指倉過夜，好易在最後一刻被震走。