有情歌王子之稱嘅「酸辣龜」自從回流返港重操故業唱情歌後，第一張唱片加咗以前好多hit情歌入去，銷量唔錯，不過再出碟當然唔可以又用舊歌做賣點，結果就拍咗套音樂電影，酸辣龜同女主角、電視台姐仔「牛胃」仲搞到傳緋聞，真係幫酸辣龜張碟做咗唔少宣傳，見報率都高咗好多。
歡情短暫
據關仁所知，酸辣龜當時真係抵受唔住牛胃嘅電力，佢哋的確擦出過愛火花，酸辣龜心諗既可以幫隻碟做宣傳，又可以大嘆溫柔鄉，何樂而不為呢？
不過牛胃份人一向貪新鮮，加上佢知道酸辣龜好似想借緋聞做宣傳，所以戀情只係維持咗一段好短嘅時間就gameover喇。不過最近佢哋又合作拍劇，唔知呢對舊愛會唔會短暫「舊情復熾」呢？關仁真係要放長雙眼睇呀！
Textby關仁
