唐司長英年最近頻頻出席不同活動，昨日寫過佢喺五月廿四日星期六到屯門公眾騎術學校之外，聽日星期日佢又會到天水圍為FashionShow主持開幕典禮。
時裝表演都要出動唐司長？原來此乃非一般的FashionShow。前一排在皇后大道中近議員辦事處撞到周梁議員，佢邀請左丁山去睇FashionShow，左丁山以為係去五星大酒店睇靚女名模樂基兒、周汶錡等，幾乎想一口應承，但回心一諗，靚女名模似乎與周梁扯不上關係噃，於是問多一句：「係唔係你搞FashionShow呀？究竟搞邊科？」
周梁笑騎騎咁話：「我梗係識搞啦，不過唔係喺五星大酒店，而係在天水圍天瑞體育館，定於六月一日國際兒童節舉行，請到唐英年嚟主禮㖭！」
據周梁講，呢個時裝表演請到時裝設計師文麗賢（JudyMann）幫忙，邀請香港時裝設計師鄧兆良、施熙瑜等共六位設計師，仲有新界土生土長嘅劉玉蓮，各自設計咗共幾十款毛衣，更交由「天水圍織女兵團」嘅團員按設計紙將一件件襯衫、外套、裙子、披肩織好。到咗六月一日，就由天水圍區內幾十位四至六十歲居民擔任模特兒，齊上catwalk表演一番，故此周梁話明此乃一場「非一般的FashionShow」，表演完畢後，所有毛衣就會送畀天水圍區內之家境清貧兒童。
個騷做完，大家拍掌完，又一切回歸正常，天水圍仍是天水圍，有乜解救？周梁特別對左丁山講：「人人都想幫助天水圍，所以唐英年並非畀面我而到天水圍為呢個時裝騷主禮，佢係畀面天水圍，關心天水圍居民啫，我個人希望長遠啲睇，『天水圍織女兵團』或『天水圍織業特工隊』能夠發揮得到，集結力量，將織毛衣發展為社會企業，織出一片藍天！」做慣電視台，果然識講嘢，不過呢條橋確係唔錯，起碼可以運用天水圍婦女嘅比較優勢（織工）嚟配合外界人士嘅投入（input），例如時裝設計師及方剛嘅製衣/銷售經驗等，做社會企業未必無望。