日產GT-R喺五月再次打破Nurburgring（紐堡林）賽道成績，以7分29秒刷新舊有紀錄，日產更誇下海口，話馬力加大至550匹、偷輕100kg嘅V-Spec版，更有望在7分20秒內跑完！日系超跑吐氣揚眉，搞到香港好多GT-R迷心思思改車，就好似富記啱啱改咗架落場版GT-R，換晒Mine's電腦、碳纖尾翼、催化等，仲要換埋格仔皮櫳同數碼電視，將速度及享樂合而為一。
記者：徐影龍
攝影：梁細權
鳴謝：Spec-R
紐堡林賽道成20公里長，勁多複合彎道，有玩過《GT4》都知條Track有幾難玩，車界更將之形容為「綠色地獄」！亦成為各廠商力壓對手嘅擂台，基本上頭十位一直被歐系超跑獨攬，到今年5月卒被日產GT-R以7分29秒打入第四位，贏Porsche911GT2三秒，多132匹嘅CarreraGT亦只可Lead住佢一秒！
碳纖尾翼再偷輕
講咗咁耐，主要係想話畀大家知GT-R被譽為08超跑中的BestBuy不無道理，08秋天推出嘅V-Spec版就將480匹馬力加大至550匹，又將車身輕量化100kg，造成車輕偈更勁格局。等唔切V-Spec版，不如轉睇香港車行嘅新改裝版本，我就搵嚟中國飄移紀錄保持者阿Wing，睇睇新版本有乜唔同。首先阿Wing話單單換入改Skyline出晒名嘅Mine's電腦，馬力提升至530匹，已經令GT-R更形兇惡，呢樣嘢喺之前嘅Mine's版已經有，新啲嘅係特別配上氣喉催化，令動力更上一層樓，佢最欣賞條氣喉內外包雙層鈦合金，好重成本，波子都係單層咋。尾翼換上Mine's製碳纖物料，車身更輕。加埋四條軨噴黑咗，跑味提升。
a.四條軨噴晒啞黑色，比原裝更具霸氣。
b.連碳纖尾翼都換上Mine's出品，信心有保證。
c.阿Wing大讚四出式尾喉，話內外都用鈦金屬包，好揼本。
格仔內櫳改風格
內櫳改變比Outlook多，前後排皮Seat換晒黑色格仔皮，仲車埋紅色線邊，格調即時唔同晒，將普通版較為單調嘅內櫳，變成帶點歐式典雅風味，而且連中置手枕位、內門板都包晒格仔皮及車上紅線，呢Part阿Wing就最鍾意，一路睇一路猛讚。另一大改，就係駕駛艙多個位置均加入碳纖，如中控台面板、錶板兩側等。較為可惜係幾個位置嘅碳纖採用貼合方式黐上去，並非將原本物料替換，否則車重可以進一步偷輕。但如此一來，車價肯定不菲，都係平平哋玩吓視覺效果算喇。講開視覺效果，富記仲將數碼接收器裝埋上車，等大家塞車時都可睇吓高清電視，夠體貼。
日產GT-R輕量版規格表
引擎：3,799c.c.DOHCV6twin-charged
馬力：530hp（換入Mine's電腦）
扭力：60kg-m/3,200-5,200rpm
傳動：6前速半自動波箱
查詢：富利堡（23330747）
心思車牌考考你
自定車牌推出後，香港的確出咗好多得意嘅組合，但都不及外國呢架GT-R咁有心思。單睇車牌「R3VO3VOM」，好難聯想到有乜意義，但從另一角度睇嘅話，就會恍然大悟！貼士：請參考香港救傷車。
山田英二教揸GT-R
喺日本有噴飯男、野人之稱嘅車手山田英二，雖然口頭禪係「最憎甩尾」，不過口是心非，不但跟首席甩尾王土屋圭市齊齊表演飄移，更喜歡將4WD夾硬甩尾！呢位大師將喺六月現身珠海賽車場，示範狠劈戰神GT-R，更會親身教授一班車迷點樣發揮GT-R極限及各項駕駛技巧等，有興趣參加就打去富利堡問吓。
今日落場感受改版雄姿
富記喺今明兩日又有CarShow，除咗大堆七人車外，今日介紹呢架改版GT-R一樣會擺喺車展畀人參觀。傳聞仲有神秘版Alphard蒲頭，想睇新車不妨落去新世界中心昅昅（時間：10am-7pm）。
預告！
R34改得仲勁
R35本身設計太好，連玩開改裝嘅阿Wing都話無嘢好改，頂籠換幾件原廠嘢已足夠。但佢最錫嘅R34就唔同，由頭到尾大變身，全身戰紋惡到嚇死人，想睇就要留意下周《Car通》報道！
